«طلع مدمن بودرة».. نادية بدعوى خلع: بايع معظم عفشي عشان يجيب فلوس للمخدرات
تزوجت «نادية» وكانت تأمل أن تنشئ أسرة وبيت مع زوجها لكن اختيارها كان خاطئ من البداية ولم يكن من المفترض أن ينتهي بها الأمر مع زوج مثل زوجها لكنه كان نصيبها.
نادية بدعوى خلع: بايع معظم عفشي عشان يجيب فلوس للمخدرات
كان سبب تواجد «نادية» في محكمة الأسرة أن بعد زواجها بفترة اكتشفت أن زوجها مدمن للبودرة، بعد سنين المعاناة التي عاشتها مع زوجها كان هذا الاكتشاف السبب في نهاية حياتها الزوجية، بعدما تحملت عدم مقدره زوجها على الإنجاب ونزولها للعمل حتى تصرف هي على بيتها، لم يقدر زوجها أي من تضحيات زوجته واستسلم لإدمانه وجعل زوجته تلجأ في النهاية لمحكمة الأسرة حتى تتخلص من حياتها معه.
اقرأ أيضا
كان مبيخلفش وأنا رضيت بأمر ربنا ومسيبتوش
قالت «نادية»: أنا اتجوزت من 2015 وكان جواز صالونات، بعد الجواز بفترة اكتشفت إن جوزي عنده مشكلة في الخلفة ومش بيخلف، مرضيش يتعالج وأنا رضيت بأمر ربنا وعيشت معاه من غير ما نخلف وقلت ربنا يعوضنا خير.
مبيكملش في شغلانة وأنا اللي بصرف عليه
تابعت «نادية»: طول جوازنا مكنش بيضربني ولا يعاملني وحش بس مكنش بيشتغل ولا بيصرف على البيت، يشتغل أسبوع ويعد قدامه شهر، أنا اللي كنت بشتغل وأصرف على البيت وأنا أصلًا مريضة قلب وبحتاج علاج، وكنت بدفع الإيجار وأصرف على البيت وعليه.
شفته بيتعاطى مخدرات قالي محصلش
أضافت «نادية»:عرفت من 2020 إنه مدمن بودرة، لما شوفته على السلم بيشم بودرة ولما واجهته أنكر وقالي محصلش، انفصلت عنه ساعتها وخفت أعيش معاه تاني، وبالذات لما عرفت ساعتها إنه بقاله كذا سنة بيشرب مخدرات، والمشكلة اللي عنده في الخلفة كانت بسبب البودرة.
جوزي مدمن مخدرات ومش عايز يطلقني
أنهت «نادية» كلامها وقالت: لما سيبته ورحت أعدت عند أهلي، راح لأهلي قالهم إنه بطل مخدرات ومش هيرجعلها تاني أبدا، رجعت لما اتحايل عليا عشان أرجع، لما رجعت لقيته بايع معظم عفشي عشان يجيب فلوس للمخدرات، وبعد كده لقيته بيشرب مخدرات تاني شفته بيتعاطى مرتين، وحاولت أقنعه يبطل بس مفيش فايدة، قررت أسيبه بعدها ورفعت قضية خلع عشان هو رافض يطلقني.
تابع أحدث الأخبار عبر
