أغرب قضايا الأسرة | صباح مطالبة بالنفقة: جوزي طلقني عشان طلبت منه مقشة
سنوات عديدة عاشتها «صباح» في العذاب والألم مع زوجها وأهله، لكن كل محاولتها في أن تصلح حياتها مع زوجها حتى لا تخرب بيتها بائت بالفشل، وفي النهاية انتهى زواجها بسبب تافه، وتعيش حاليًا في حسرة على سنين عمرها التي ضيعتها في زواج كانت نهايته حتمية من البداية.
"مستحملاه هو وأهله بقالي 10 سنين" هذا كان أول ما قالته «صباح» عند سؤالها عن سبب تواجدها في محكمة الأسرة ومعها أطفالها الذي حرموا من أن يعيشوا حياة طبيعية مع أب وأم يحبوهم ويرعاهم في بيت واحد، ولكن في سنهم الصغير تواجدوا على أبواب محكمة الأسرة، وكل هذا بسبب عدم رغبه أبيهم في تحمل مسئوليتهم وأهله الذي كانوا سبب خراب البيت وتدمير أسرتهم.
اقرأ أيضا
اتخدعت في جوزي وأهله
قالت «صباح»: اتجوزت من 10 سنين وخلفت 3 عيال ولد وبنتين، كان جواز صالونات، في الخطوبة كان يبان عليه أنه شخص كويس محترم لكني اتخدعت فيه هو وأهله، من ساعة الجواز والمشاكل بدأت لكني كنت بعدي الدنيا وقلت البيوت كلها فيها مشاكل، وعشت معاه واتحملته عشان مخربش بيتي وأربي عيالي وميتبهدلوش.
أهله بيتلككوا يعملولي مشكلة
تابعت «صباح»: كنت متجوزة في بيت عائلة وطبعا كله حذرني من الجواز في بيت العائلة بس أنا قلت مادام هتقي ربنا فيهم ومعملش معاهم مشاكل كل حاجة هتكون كويسة لكني كنت غلطانة، أهله كانوا بيتلككوا يعملوا معايا أي مشكلة لو قلت أي كلمة يعملولي عليها مشكلة كبيرة، امه واخواته كله محدش فيهم كان بيقف في صفي، بس كبرت دماغي وبرضو قلت مخربش بيتي ومعملش مشاكل وأعيش.
اقرأ أيضا
طلقني عشان مقشة
لم يقدر الزوج أو أهله أي من التضحيات التي قدمتها حتى تستمر حياتها ولا تخرب بيتها، ولكنهم زادوا في افترائهم عليها وجعلوا الحياة مستحيلة، حتى فاض الكيل ب«صباح» وقررت أنها لا تستطيع أن تكمل حياتها مع زوجها.
أضافت «صباح»: الحياة مع جوزي كانت كلها ضرب وإهانة ومبيصرفش عليا أنا وولادي غير على القد وحاولت معاه كتير إني أصلح حاله لكن مفيش فايدة، لحد في مرة، كنت عايزة مقشة وقالي معهوش فلوس يجيبها، قلتله هاتها وهحاسبك قالي مش هديكي حاجة، ومسكني ضربني وعمل مشكلة بسبب حاجة تافهة وطردني من البيت أنا والعيال.
أنهت «صباح» كلامها وقالت: فضلت ست شهور في بيت أهلي، الناس حاولت تصلح بينا لكن حماتي رفضت إني أرجع وفي الأخر جوزي طلقني غيابي، ومبيصرفش على عياله من ساعة الطلاق، وجيت محكمة الأسرة عشان أرفع دعوى نفقة عشان حق ولادي، وربنا يعوض عليا السنين اللي ضيعتها معاه.
تابع أحدث الأخبار عبر
