ياسمين للقاضي: ابني بعد ما كان بيحوش عني الضرب بيلومني إني اتطلقت من أبوه
حاولت «ياسمين» أن تصلح حياتها مع زوجها الذي كانت تكن كل الحب والاحترام، لكن زوجها استنفد كل رصيده من هذا الحب والاحترام عند زوجته، وجعل الحياة معه مستحيلة ولا تحتمل، وجعلها تلجأ في النهاية لمحكمة الأسرة.
تزوجت «ياسمين» من زميل لها في العمل، وكان قبل الزواج شخصت محترمت، وتوسمت فيه الخير وأنه سيكون الزوج المناسب لها، لكن بعد الزواج والعشرة تحول لشخص آخر، وملأ حياتها بالدموع والضرب والإهانة، ولم تتحقق أي من وعوده في أن يعيشا حياة سعيدة سويا، وفي النهاية دمر أسرتهما، وجعل حتى ابنهما يلوم الأم على أفعال زوجها.
اقرأ أيضا
«ياسمين»: كان يعرف عليا ستات من أول أسبوع جواز
"كان شخص مش كويس ومعاملته لا تحتمل"، هذا ما بدأت به «ياسمين» كلامها عن زوجها، وتابعت: "بقالنا 11 سنة متجوزين، عرفته من مكان كنت باشتغل فيه، كان ما يبانش عليه إني هشوف منه كل البهدلة دي، كان بيضرب ويشتم بسبب حاجات كتير مهمة أو مش مهمة، كل الحاجات دي ما بانتش غير بعد العشرة، المشاكل بدأت من أول أسبوع جواز لما عرفت إنه بيكلم واحدة ست كانت زميلته في الجامعة في التليفون، ولما واجهته اتحايل عليا إني مسيبهوش، وقال لي مش هتتكرر تاني، وصدقته لأني بحبه".
«ياسمين»: سيبته لما بقى يرفع عليا المقص في الخناقات عشان يموتني
وتابعت «ياسمين»: "المشاكل كل مدى كانت بتبقى أسوأ، ما كانش بيصرف غير كل فين وفين، وف آخر 3 سنين مش بيشتغل خالص، وأنا اللي باشتغل وأصرف، وياريت كان عاجبه، وكمان يعرف عليا ستات، كل فترة كنت باشوف حاجة على تليفونه وأقول له عايزة أتطلق يضربني، ويقول لي انتي فاكرة نفسك ست أصلا، لحد آخر مشكلة حصلت وقررت أسيبه لما كان عايزني أسد فلوس هو سالفها، ولما رفضت لأني ما كانش معايا فلوس رفع عليا المقص، قلت هو كده خلاص هيموتني لو كملت معاه، وأنا خلاص ما بقيتش عايزاه".
اقرأ أيضا
«ياسمين»: جوزي عمل لابني غسيل مخ عشان طلبت الطلاق
وأضافت «ياسمين» والدموع في عينيها: "الطلاق حصل ودي لما طلبت منه الطلاق ووافق، واتفقنا إننا نتعامل بما يرضي الله عشان الولد والبنت اللي بيننا ونفسيتهم، وللأسف صدقت إنه ممكن يتعامل باحترام ويتقي الله فيا وفي عيالنا، بس أخد ابني مني من سنة ونص عشان يعاقبني؛ لأني أنا اللي طلبت الطلاق، وعمل لابني غسيل مخ، وأقنعه إن أنا اللي خربت البيت لما طلبت الطلاق، مع إن ابني كان شاهد على عمايل أبوه، وكان بيحوش عني الضرب، ودلوقتي بيقول لي كنتي استحملتي، ومش راضي يعيش معايا، ودلوقتي رافعة دعوى نفقة وحضانة عشان؛ أرجع ابني لحضني تاني".
تابع أحدث الأخبار عبر
