أميرة بدعوى خلع : بعد 27 سنة طردني أنا وبناتي بهدوم البيت عشان نزوة
تزوجت «أميرة» ابن عمتها وتوسمت فيه أن يكون زوج صالح يحميها ويرعاها ويتقي الله فيها وتنشئ معه أسرة، ولسنين عديدة ظنت أن حملها أصبح حقيقة وأنها محظوظة لكن القدر كان يخبئ لها مفاجئات لم تتوقعها.
عيشت مع جوزي أكتر من أهلي
بدأت «أميرة» حديثها عن قصتها وقالت: بقالي 27 سنة متجوزة ابن عمتي، اتجوزت وأنا 17 سنة عيشت مع جوزي أكتر ما عيشت مع أهلي وخلفت 4 بنات بنتي الكبيرة بتعمل ماجيستير والبنتين التانين في الجامعة والرابعة في ثانوي، كنا عايشين زي أي ناس طبيعية، كنت صايناه وصاينة بيته، ومربياله بناته أحسن تربية لحد من قريب هو باعني ودمر حياتنا.
لم يرعى الزوج أسرته أو يحافظ عليها بل دمر أسرتهم وخان ثقة زوجته وتزوج بأخرى، وترك زوجته وبناته وحدهم دون سند أو ضهر وجعل زوجته تصل في النهاية لمحكمة الأسرة.
خاني اتجوز عليا عرفي
تابعت «أميرة»: من سنة تقريبا لاحظت في حاجة متغيرة فيه وبقى يرجع متأخر وهو نفسه متغير، كنت حاسة أن في واحدة تانية في حياته واجهته وسألته في الأول أنكر وبعد كدة اعترف أنه اتجوز عرفي، سيبت البيت ساعتها مكنتش أقدر أكمل في الوضع ده ومستحملتش الخيانة، اتحايل عليا نرجع وقطع الورقة العرفي قدامي وقالي سابها ومش هيرجعلها تاني، قلت ارجع عشان مخربش بيتي وعشان خاطر بناتي ميتبهدلوش.
اقرأ أيضا
طردني أنا وبناتي بالهدوم اللي علينا
أضافت «أميرة»: لما رجعت قعد أول شهرين مستقيم وبيرجع بدري ومفيش مشاكل ولا حاجة تخليني اشك فيه، لحد ما رجع تاني إنه يتأخر تاني زي الأول، واجهته وسالته لو مسابهاش قالي اه مسيبتهاش قلتله انا مقدرش أعيش في الوضع ده، طلبت منه إني أعد في شقتي ومش هطلق عشان خاطر ولادي لكنه مرضيش وجاب أمه اللي هي عمتي وطردوني من الشقة أنا وبناتي بالهدوم اللي علينا.
تابعت «أميرة» كلامها: بقالي 6 شهور سايباه، مسألش ولا بتلفون ولا صرف على بناته جنية ومرديش حتى يبعتلهم الكتب عشان امتحاناتهم، بنتي الكبيرة قالتله بعد ما طردنا انه يأجرلنا شقة نعيش فيها رفض، دلوقتي عايز يرجعنا بس أنا مقدرش اثق فيه تاني، والبنات مش قادرين يبصوا في وشه أصلا بعد اللي عملوا معاهم وطردهم، ودلوقتي رافعة عليه قضايا خلع ونفقة ومسكن.