«بيتكيف بفلوسي».. فاطمة في دعوى خلع: بياخدها من ورايا يجيب مخدرات
شهدت أعتاب محكمة الأسرة العديد من السيدات اللاتي لجأن إليها ليحصلوا على حقوقهن وحريتهن، والعديد من هذه السيدات كان سبب تواجدهن هو إدمان أزواجهن على المخدرات مثل «فاطمة».
بعد زواج «فاطمة» كانت صدمتها ان الحياة لم تكن كما توقعت أبدا فاكتشفت أن زوجها مدمن للمخدرات، أرادت «فاطمة» أن تترك زوجها بعد علمها لكن من أجل أبنائها حاولت أن تصلح حال زوجها وتعالجه حتى فاض بها الكيل من حياتها معه، وبالرغم من رفضه الانفصال قررت الزوجة التوجه لمحكمة الأسرة حتى تحصل على حريتها منه وتنتهي من العذاب الذي تعيش فيه.
زواج معارف
قالت فاطمة: «أنا متجوزة من 16 سنة عندي ولد 14 سنة وبنت 8 سنين، رافعة على جوزي قضية بسبب المشاكل اللي شفتها معاه، أنا سايباه من سنة تقريبا، أنا وهو مكناش قرايب، عرفنا بعض و اتجوزنا عن طريق المعارف، في أول الجواز كان عادي مفيش حاجة».
جوزي طلع مدمن مخدرات
تابعت فاطمة: «انا عارفة أنه بيشرب مخدرات من زمان كان بيشرب في المناسبات بس دلوقتي بيشرب كل يوم وبقى مدمن، عرفت كدة لأنه بيشرب قدامنا في البيت عافية وعايش معانا بلطجة»
عايزة اسيبه من زمان
أضافت فاطمة: «حاولت أعدله ولما أقوله اتعالج ميرضاش، عرضت عليه أنه يتعالج وأنا اصرف عليه قالي أنا مش عيان ولو عايز أبطل مخدرات هبطل، عايزة اسيب من زمان من اول ما الوضع بقى كدة، بس كنت بحاول أحافظ على بيتي وولادي مخربش على نفسي».
بيطفش العيال عشان يشرب مخدرات
أكملت الزوجة: «طبعًا مكنش بيصرف فلوسه كلها كانت رايحة على الأهم بالنسباله المخدرات اهم من بيته وولاده، أنا اللي بشتغل واصرف على ولادي، اللي خلاني قررت اسيبه هو أنه كان بيطرد العيال من البيت وأنا في الشغل عشان يعرف يعد براحته ويشرب مخدرات، ساعتها قلت ده هيضيع ولادي وقررت اسيبه عشان ألحقهم».
دعوى خلع
أنهت الزوجة كلامها: «من ساعة ما سيبته وأنا عند اهلي وهو عند أهله، طلبت الطلاق وهو رفض عايز يعيش معايا بالعافية وعايز يرجعني عشان بياخد مني فلوس للمخدرات، وجيت أرفع قضية خلع لأن حتى ولادي مش راضين أني ارجعله»
تابع أحدث الأخبار عبر
