عايدة في دعوى نفقة: المخدرات لحست دماغه وبحس إني راجل البيت مش هو
تزوجت «عايدة» وانجبت أطفالها وكان حلمها بسيط بيت وأسرة وعائلة، ولكن الظروف أوصلتها في النهاية لمحكمة الأسرة بعد ما دمر زوجها أسرتها بسبب إدمانه للمخدرات.
"طلع مدمن من زمان وأنا معرفش" هذا ما قالته «عايدة» عن سبب تواجدها في محكمة الأسرة، دخل وحش المخدرات حياة «عايدة» ودمر أسرتها، فاستسلم الزوج للمخدرات وحول حياة زوجته لجحيم دائم، حاولت «عايدة» بكل الطرق أن تصلح زوجها وتعالجه من إدمانه، لكنه تمسك بقراره وأجبرت أن تتحمل مسئولية أولادها وبيتها لأن زوجها المخدرات دمرت جسده وعقله، وفي النهاية أوصلها لمحكمة الأسرة بعد ما قدمت لزوجها الدعم النفسي والمادي طوال سنين زواجهم.
أبويا ساعده وجابله شقة يتجوز فيها
قالت «عايدة»: اتجوزت جواز صالونات وفضلت مع جوزي 14 سنة، وخلفت منه وكنت فاكرة أننا عايشين وحياتنا طبيعية لكني كنت غلطانة، لما اتجوزنا جوزي مكنش معاه يجيب شقة أبويا ساعده، وكنت متجوزة في بيت أبوبا وجوزي كان المفروض يجيب شقة، لكنه مجبش وأنا قلت خلاص ادينا عايشين وقلت ظروفه صعبة هيجيب منين وعيشت ووافقت.
مدمن مخدرات من زمان وأنا معرفش
تابعت «عايدة»: مع الوقت اكتشفت أن جوزي بيشرب مخدرات، واتضح إنه كان بيشرب من زمان وأنا معرفش، لما عرفت حاولت معاه وقلتله يبطل عشان أولاده وفعلا بطل ورجع تاني، ومع الوقت كان بيزيد في الإدمان وبقى مبيقدرش لا يشتغل ولا يصرف علي أنا وولاده بقى مبيكملش في شغلانة.
أضافت «عايدة»: حصل مشاكل كتير بينا والحياة بقت صعبة، مكنش بيضربني بس المخدرات لحست مخه خلته بني أدم تاني كنت بحس إني الراجل وهو مش عايش معانا أصلا، بقى يروح أي شغل ميعمرش فيه بسبب المخدرات ويقعد تاني، بعت كل دهبي عشان أعرف أصرف على أولادي وهو ولا في دماغه، لحد مع الوقت بقى محلتيش حاجة وبيعت كل حاجة عشان خاطر أصرف على العيال.
اقرأ أيضا
مبيسألش على أولاده حتى بالتليفون
أكملت الزوجة الحديث عن معانتها وقالت: لحد ما الحياة معاه مكنش ليها لزمة، أنا كنت راجل البيت وهو موجود، ولما تعبت منه طلبت الطلاق ورفض يطلقني، بس أصريت على موقفي، واتطلقت من سنة ودي، ومن ساعة الطلاق مبيسالش حتى بالتليفون على أولاده، ولا كانه كان أبوهم مع انه كان قبل كدة أهم حاجه في حياته عياله، ودلوقتي رفعت قضية نفقة، عشان الولاد عايزين فلوس عشان الدروس وظروف الحياة بقت صعبة، وهو دلوقتي اتجوز ممرضة كانت بتعالج والدته عرفي بعد ما اطلقنا.
تابع أحدث الأخبار عبر
