"مبيكملش في شغلانة".. عزيزة بدعوى خلع: نفسي يتغير عشان اتنازل عن القضية
تواجدت «عزيزة» في محكمة الأسرة وعلى عكس العديد من السيدات الاتي يتواجدن في المحكمة ويأملن أن يتخلصن من حياتهن مع أزواجهن، كانت «عزيزة» تتعلق بأي أمل حتى تعود حياتها لطبيعتها ولا يتم الانفصال بينها وبين زوجها.
تزوجت «عزيزة» من 17 عام، وتواجدت في النهاية أمام محكمة الأسرة والدموع تغرق وجهها بسبب زوجها الذي عاشت معه ملأها الألم بسبب عدم تحمله للمسؤولية، فكان لا يكمل الزوج في وظيفة وترك العديد منهم كلهم بدون سبب مقنع ويأست الزوجة من الحياة التي عاشتها معه ومع أبنائها وتوجهت في النهاية لمحكمة الأسرة حتى ترفع دعوى خلع وهي مازالت تعيش مع زوجها في نفس المنزل، وهي لازالت تأمل أن ينصلح حال زوجها.
جوزي مش بيشتغل ولا بيصرف علينا
قالت عزيزة: «أنا متجوزة من 17 سنة جوزي كان أكبر مني بكتير لما اتقدملي اتجوزته وخلفت منه ولدين، لحد دلوقتي مسيبتوش لسه معاه في البيت واحنا في مشاكل كتير، مبيشتغلش ولا بيصرف من زمان، ويقولي كل لما اشتكي دي الظروف والناس كلها حالها كدة.»
مبيكملش في شغلانة
تابعت عزيزة: «كل شغلانة يسيبها بحجة مختلفة، عشان كبير في السن ميقدرش يشتغل فواعلي ويشيل ويرفع، كان بيبقى مدير في اماكن ويسيب الشغل ويعد في البيت من غير سبب، ميحبش حد يقوله كلمة وهو بيشتغل ولا عايز يتعب نفسه خالص»
مش لاقيه أكل أنا والعيال
أكملت عزيزة: «مكنش على طول كدة في الأول كان كويس وبيشتغل لكن كان على طول مش مجتهد، مرضيش حتى يخليني اشتغل عشان أصرف على البيت وعلى العيال، وفي كل حاجة مش مكفي لا في فلوس دروس أو مصاريف أكل وشرب، كنت بروح أعد عند أهلي عشان يصرفوا علينا.»
دعوى خلع
أنهت الزوجة حديثها: «أمي اللي رفعتلي قضية الخلع لما شافت حالي أنا والعيال وأنهم بيخسوا من كتر ما احنا مش لاقيين ناكل، وهو ميعرفش اني رافعة الخلع و لسه عايشة معاه عشان مدرسة العيال قريبة من البيت، نفسي يعمل أي حاجة تخليني اتنازل عن القضية لأني لسه بحبه ومش عيزة أخرب بيتي.»
تابع أحدث الأخبار عبر
