هبة في دعوى خلع: المخدرات لحست دماغه وخلته يمشي في الشارع عريان
تخيلت "هبة" عندما تقدم لها زوجها، أنه هو الفارس الذي سيحقق لها كل أحلامها، وأنها سوف تدخل معه قفص الزوجية، ولكن تحولت أحلامها بعد الزواج ، بعدما اكتشفت أن زوجها مدمن مخدرات، وانتهى الحال بتعدي زوجها عليها وعلى بناتها بالضرب، مما جعلها تلجأ في النهاية لـ محكمة الأسرة لتنقذ نفسها وبناتها.
20 عامًا عاشتهم "هبة" في ألم ومعاناة مع زوجها مدمن المخدرات، وعاشت وتحملت من أجل أن تربي بناتها مع والدهم، قبل أن يلجأ للمخدرات كان زوج «هبة» رجل وأب طبيعي يعامل أسرته بالحسنى، لكن منذ أن دخلت المخدرات حياته أصبح شخص آخر ودمر أسرته و«هبة» وبناتهم.
«هبة»: جوزي كان بيشرب المخدرات قدامي أنا وعياله الصغيرين
قالت «هبة»:بقالي ٢٠ سنة متجوزة كنت ١٩ سنة لما اتجوزت عندي بنتين، جوزي كان راجل كويس جدًا، وعيلته ناس محترمة جدًا، كان بيشرب مخدرات من زمان بس كان آخره سيجارة الحشيش، لحد من ٤ سنين بقى يتعاطى كل أنواع المخدرات، وكان بيشرب قدامنا من ساعة العيال كانوا صغيرين، وحاولت معاه كتير أن حاله يتصلح لكن مكنش في فايدة.
«هبة»:المخدرات خلته كسر مناخير بنتي
تابعت «هبة»: صبرت عليه واستحملته عشان خاطر عيالي، ولما كنت اشتكي لأهله يقولولي معلش استحملي،ه ده زي المريض، لحد ما المخدرات خلته مش في وعيه خالص، بقى يمشي من غير هدوم في البيت، ويتهياله إنه شايف ناس في البيت مش موجودين، لحد في مرة لقيته لابس هدومه الداخلية وعايز ينزل الشارع بيها، جيت أوقفوه مسكني ضربني أنا وبناتي كسر مناخير بنتي الكبيرة وبنتي الصغيرة عملتها على نفسها من الخوف،. لما لاقيت الوضع بقى كدة خفت إن يحصل حاجة ليا ولعيالي فخدتهم ومشيت.
«هبة»: خرج من المصحة أسوء من الأول
تابعت الزوجة: بعد ما سيبته صاحبة البيت قالتلي جوزك طالع نازل من غير هدوم على السلم، اتصلت باخواته خدوه ودوه مصحة يتعالج قعد 5 أشهر، وقلت يمكن نتحسن ونرجع لبعض لقيته بقى بني آدم أسوء من الأول، طلبت منه الطلاق، قالي اتنازلي عن كل حاجة واتنازلت فعلا، لكنه مرضيش يطلقني برضو، كلمت أهله قالولي عندك المحاكم مش هنعرف نعملك حاجة، وفعلًا رفعت عليه دعوى خلع وكسبتها، عرف بالقضية ومكنش عنده مشكلة ولا سأل فينا أنا وعياله لمده 7 أشهر، ودلوقتي رافعة عليه دعوى نفقة.
تابع أحدث الأخبار عبر
