«قلب حياتي جحيم عشان الولد».. مها : طلقني لما افتكرني حامل في بنت
عاشت “مها” في رعب وخوف مع زوجها الغير متزن والذي لم يتق الله فيها منذ أول زواجهم، ولجأت في النهاية لمحكمة اﻷسرة لتحصل على حقوقها وتداوي جروح زواج لم يدم سوى 9 أشهر فقط.
“عورني بالسكينة في رقبتي في أول 3 شهور جواز” هذه كانت من أول أفعال زوج “مها” معها بدل من أن تعيش أول شهور لها في حياتها الزوجية في فرحة، وعندما رزقهم الله بنعمة الأطفال كسر الزوج فرحة مها ﻷنه اعتقد أنها حامل في بنت وهو كان يريد ولد.
اقرأ أيضا
عيشت معاه أسوء 9 شهور في حياتي
قالت “مها”: اتجوزت في 2015 اتطلقت بعد 9 شهور بس من الجواز اتبهدلت فيهم وكنت حامل في 4 شهور في ابني وقتها، كان جواز صالونات ومكنش يبان عليه أي حاجة قبل الجواز، بعد الجواز بان عليه أنه شخص نرجسي وعنده مشاكل نفسيه، من أول 3 شهور جواز رفع عليا السكينة وعلمت على رقبتي وراح عند أهلي قالهم أنا كنت بهزر معاها، وبعد 5 شهور جواز كان هيحدفني من الدور السابع، كان بيعمل كل ده عشان يخوفني منه.
قلب حياتي جحيم لما عرف إني ممكن أجيب بنت
تابعت مها: لحد ما حملت بعد الجواز على طول هو كان صعيدي وعايز ولد هو وأهله ومبيحبوش البنات، رغم أن إخواته كلهم عندهم بنات بس أمه كانت عايزاه هو بالذات يجيب ولد، في أول الحمل الدكتور قالتلي احتمال يكون بنت، بدأت المشاكل لما حس اني ممكن أكون حامل في بنت، بقى ضرب وإهانة وبهدلة ومبيصرفش كان بينكد عليا طول الوقت على أي حاجة.
اقرأ أيضا
رفض يطلقني غير لما اتنازل عن حاجتي
تابعت مها: فضلنا 7 شهور فاكرين إني حامل في بنت لكن في الشهر السابع الدكتورة قالتلي إني حامل في ولد، بس وقتها خلاص أنا كنت ماشية في إجراءات الطلاق ﻷني مكنتش قادرة اتحمل أعيش مع البني أدم ده، اتطلقنا بخلع لأنه مرضيش يطلق ودي عشان يخليني اتنازل عن كل حاجة ،اخدت حجات من حاجتي بس مش كلها.
لما عرف إني خلفت ولد رفع دعوى رؤية
ابني اتولد، وهو معرفش إني خلفت ولد غير من القضايا، مسألش عن ابنه غير لما بقى عنده 6 شهور، رفع دعوى رؤية لما عرف بس إنه ولد، بسيبله الولد في الرؤية عشان يشوفه، هو بيكلم ابني عليا وحش ويشتم عليا، وأنا مبجبش سيرته بأي حاجة وحشة.
لو جاب لابنه حاجة ﻻزم ينكد عليه
مش بيصرف على ابنه، ولما رفعت دعوى نفقة لقيته مش منتظم في الدفع، بيفضل بالسنة عشان يدفع لازم نرفع دعوى متجمد ويالدفع يالحبس، لو جاب لابنه أي حاجة ينكد عليه ويضربوا نفس اللي كان بيعموا معايا واحنا متجوزين، دلوقتي رافعة عليه دعوى نفقة واجر مسكن، وأنا اعده دلوقتي عند أهلي وهو اتجوز تاني.
تابع أحدث الأخبار عبر
