محكمة الأسرة.. "نهى": حابسني في البيت وحارمني أشوف أمي
أقامت "نهى" دعوى قضائية بمحكمة الأسرة تطلب فيها الطلاق من زوجها، بسبب قسوة قلبه عليها وعلى ابنتهما، واعتياده إهانتها وسبها والاعتداء عليها ما اضطرها في النهاية للتوجه إلى محكمة الأسرة.
قضايا محكمة الأسرة..متجوزة بعد فترة خطوبة قليلة
بدأت «نهى» حديثها وقالت: «أنا متجوزة بقالي 8 سنين وخلفت من جوزي بنت بس، اتجوزنا جواز عن حب اتعرفت عليه عن طريق ناس معارف، بعد ما اتقدملي صممت عليه ووقفت قصاد أهلي واتجوزنا بعد فترة خطوبة قليلة».
دعاوي محكمة الأسرة..حابسني في البيت
أكملت «نهى» حديثها وقالت: «بعد الجواز طلب مني اسيب الشغل وأقعد في البيت وهو اللي يشتغل وأنا معترضتش ووافقت مكنتش عارفة إنه طلب كدة بس عشان يحبسني في البيت، مكنش بيخليني أروح في حته كان بيبقى مش عايزني أروح عند حد من أهلي حتى أمي اللي ساكنة جنبي مش بيخليني اشوفها غير كل ٣ شهور مرة وهي ساكنة في الشارع اللي جنبي لما عملت مشكلة بسبب الموضوع ده بقي يوديني مرة في الأ،سبوع والمرة دي يبهدلني فيها ويقعد بالأسبوع ميكلمنيش».
طردني من البيت بعد ما شتم أهلي
تابعت «نهى» حديثها قائلة: «كان بيسبني في للبيت لوحدي لنص الليل ويقعد مع صحابه في الشارع، أخر مرة كان قاعد مع واحد صاحبه في الشارع لحد 6 الصبح والنور قطع عليا انا وبنتي وكنت خايفة أنا وهي كنا لوحدنا وفضلت اتصل عليه ميردش، لما طلع قولتله مبتردش عليا ليه افرض حصلي حاجة أنا والبنت قالي مش عاجبك روحي اشتكيني، اتخانقت معاه وكانت مشكلة كبيرة غلط فيا أنا وأهلي وضربني وطردني من البيت».
مبيسألش فيا أنا وبنته
أنهت «نهى» حديثها قائلة: «رحت عند أهلي لما طردني وكانت بنتي معايا، حاول يرجعني مرة واحدة بس وأهلي رفضوا إني أرجع وقتها، وبعد كدة كبر دماغه ومسألش فينا تاني ولا بقى بيسأل على بنته ولا بيشوفها وجيت عشان أرفع عليه قضية نفقة».