أخبار محكمة الأسرة
شروق لـ محكمة الأسرة : بيتجوز ستات أجانب كبار عشان يصرفوا عليه
سبب تواجد «شروق» في محكمة الأسرة هو زوجها الذي عاشت معه حياة زوجية غريبة وكانوا ليس مثل أي زوجين بل كانت حياتهم مختلفة تماما، منذ زواجهم اكتشفت الزوجة أن من اختارته شريك لحياتها يتزوج من سيدات كبار في السن في عمر والدته حتى يصرفوا عليه ويكفوا طلباته، وعندما لم تستطع الزوجة تحمل إهانة كرامتها أكثر توجهت لمحكمة الأسرة بحثا عن حل لمشكلتها ونهاية لزواجها.
قصص محكمة الأسرة..اتجوزنا على طول بعد الخطوبة
قالت «شروق» في بداية حديثها: «انا متجوزة من ١٠سنين ومخلفة ولدين من جوزي، كان جواز عادي اتعرفنا على بعض عن طريق ناس مشتركين بينا واتقدملي كان شخص مناسب وكويس، اتخطبنا واتجوزنا على طول بعدها بفترة قصيرة عشان كل حاجة كانت تمام ومفيش مشاكل وهو كان مستعجل على الجواز».
دعاوي محكمة الأسرة..جوزي بيتجوز ستات كبار وبيقلبهم
أكملت «شروق» حديثها وقالت: «بعد الجواز اكتشفت إنه بيتجوز ستات أجانب عواجيز من قبل ما نتجوز وهو بيتجوزهم كل واحدة شوية ويقلب منهم فلوس، وفضل مكمل بعد جوازنا على الحال ده وكل ما اقفشه مع واحدة يسيبها ويحلف إنه مش هيعمل كدة تاني ، وبعد فترة أكتشف إنه رجع تاني وبيعمل نفس الحاجة تاني ».
حكايات محكمة الأسرة..أهلي رافضين طلاقي من جوزي
تابعت «شروق» حديثها قائلة: «كان عايش حياته الستات الأجانب العواجيز اللي بيصرفوا عليه ومبيشتغلش عايش معايا مبيصرفش ولا جنية ومعتمد عليا في كل حاجة، حاولت كتير اسيبه كتير لكن مكنش بيرضى يطلقني وأهلي كانوا واقفين قصادي دايما وبيقولوا مينفعش أطلق عشان معايا عيال لحد ما حطيتهم قدام الأمر الواقع وسيبته».
قضايا محكمة الأسرة.. مبيسألش في عياله بعد ما سيبته
أنهت «شروق» حديثها قائلة: «سيبت جوزي بسبب أخر واحدة أجنبية اتجوزها هي مرضيتش تسيبه ومركزة معاه مش مخلياه واعي لحاجة، وبعد ما سيبته اتجوز واحدة تانية مصرية ولسه مكمل مع اخر واحدة عرفت وانا بعمل قيد عائلي، وجيت عشان ارفع عليه قضية نفقة لأنه مبيسألش في الولاد من ساعة ما سيبته ولا بيبعت جنية واحد للولاد».
تابع أحدث الأخبار عبر
