«عندها ورم في المخ».. بثينة في دعوى نفقة: عم بنتي مستولي على فلوسها ومش عاوز يعالجها
تحطم زواج «بثينة» في مدة صغيرة عندما أخفى زوجها وأهله حقيقة مرضه عنها قبل الزواج ولم تستطع العيش معه، ولازالت حتى الآن تدفع ثمن زواج لم يستمر سوى 3 شهور.
طلبت «بثينة» الطلاق من زوجها عندما تزوجته وعلمت بحقيقه مرضه بالصرع الذي أخفى عنها مرضه به، وبعد طلاقها عاشت لتربي ابنتها، وبعد فترة اكتشفت مفاجأة لم تتوقعها وكسرت قلبها عندما علمت أن ابنتها لديها ورم في المخ وتحتاج عده عمليات لتستعيد صحتها، وتواجدت «بثينة» في محكمة الأسرة حتى تحصل على حقوق ابنتها التي أصبح كل هدفها أن تراها بصحة وعافية.
اقرأ أيضا
اكتشفت أن جوزي عنده صرع
قالت «بثينة»: اتجوزت في 2010 واتطلقت في 2010 وفضلت مع جوزي 3 شهور بس، بعد ما اتجوزنا اكتشتفت إنه عنده مرض الصرع وهو مكنش قايلي ولا معرفني لاهو ولا أهله، لما اكتشفت حاولت اتعايش مع مرضه لكن كان صعب عليا مقدرتش اتحمل وفي الأخر طلبت الطلاق، لكنه رفض يطلقني.
اتطلقت بمشاكل كتير مع جوزي وأهله
تابعت «بثينة»: رفعت قضية طلاق للضرر لأنه مريض صرع ومن حقي أطلق منه لكني معرفتش وقتها أثبت إنه تعبان ومعرفتش أرفع القضية وبعد مشاكل كتير مع جوزي وأهله اتطلقت ودي، خلفت من جوزي بنت بس ولما اتطلقت حمدت ربنا عليها وعيشت ومكنتش عايزة حاجة غير إني أربيها ومخليهاش محتاجة حاجة.
عم بنتي رفض يديني فلوس عشان أعالجها
أضافت «بثينة»: من قريب اكتشفت أن بنتي تعبانة وعندها ورم في المخ ومحتاجة عمليات كتير عشان تبقى كويسة، وطبعا أنا مش معايا فلوس كفاية، حاولت اتواصل مع أهل جوزي لقيت أن أخوه بقى مستولي على كل فلوس أبو بنتي وهو المتحكم فيها بسبب مرضه، ولما طلبت منه فلوس عشان خاطر بنتي المريضة تتعالج رفض يديني.
عم بنتي مستولي على حقها
أنهت «بثينة» كلامها وهي قلبها محروق على ابنتها: دلوقتي جوزي اتجوز وخلف عيال تانية وبنتي بقى ليها اخوات من ابوها وعايشين وبيصرفوا عليهم، وعم بنتي مش راضي يصرف عليها، وأنا متبهدلة في المحاكم برفع قضايا نفقة، وجوزي وأهله كل 3 شهور يا بيبعتوا حاجة بسيطة عن طريق المحامي يا مبيبعتوش، وأنا مش عايزة منهم حاجة أنا بس عايزة بنتي تقوم بالسلامة.
تابع أحدث الأخبار عبر
