سلوى للقاضي: طليقي مش هاين عليه يسبني أفرح في حياتي واتجوز زيه
تزوجت «سلوى» في أول حياتها من شخص واعتقدت أنه شريك حياتها الذي ستظل بجواره لباقي عمرها لكنها كانت مخطئة ووصلت فقط لألم وحزن في حياتها معه ولكنها قررت ألا تستسلم لهذا الواقع الذي تعيش فيه مع زوجها وقررت أن تغير حياتها وتتركه.
"اتطلقت من ١١ سنة وهو السبب إني جيت محكمة الأسرة" هذا ما قالته «سلوى» عن سبب تواجدها في محكمة الأسرة اليوم، وكان معها أمها وطفلتها من زوجها الذي استغل عندما حاولت «سلوى» أن تجد فرصة لتعيش حياة مستقرة مرة أخرى وتوقف عن صرف أي أموال على ابنته الذي ليس لها أي ذنب في أي مشاكل بين الزوجين، ولم يترك ل «سلوى» أي حل سوى أن تلجأ لمحكمة الأسرة لتحصل على حقوق ابنتها.
اتجوزت ٤ سنين بس ومكانش لينا نصيب نكمل سوا
قالت «سلوى»: أنا متطلقة من 11 سنة اتجوزت ٤ سنين بس وخلفت منه بنت، مكنش في نصيب اعيش معاه الحياة كانت صعبة وكان مفيش أي تفاهم بينا من ساعة ما اتجوزنا، حاولت أصلح كتير ومخربش بيتي لكن مكنش في أمل اننا نكمل سوا، لحد ما خدت القرار اني هطلق واطلقت فعلا بعد مشاكل كتير أوي مع ابو بنتي.
اتجوزت بعد الطلاق لأني كنت لسه صغيرة
تابعت «سلوى»: كنت زعلانة على حالي بعد اللي حصلي بس قلت أعيش وأحمد ربنا وأربي بنتي، بعد فترة من الطلاق اتقدملي واحد محترم واتجوزته بعد فترة، قلت أحاول أشوف حياتي أنا اتطلقت وانا لسه صغيرة في أول العشرين والحياة لسه قدامي وممكن اتجوز تاني، عرفت جوزي بظروفي ووافق عليها لكن الله يسامحه طليقي مسابنيش أفرح.
طليقي عايز جوزي يصرف على بنته
أضافت «سلوى»: بنتي عايشة مع أمي من ساعة ما اتجوزت انا كنت بشوفها على طول ولو محتاجة حاجة بساعدها ومش رامياها، لحد ما طليقي عرف اني اتجوزت عمل معايا مشاكل كتير مع انه هو اتجوز بعد الطلاق على طول، وبطل يصرف على بنتنا لما اتجوزت وحاولت أكلمه انه يصرف على البنت رفض وقال خلي اللي اتجوزتيه يصرف عليها، واضطريت بعد مشاكل كتير معاه أجي محكمة الأسرة وأرفع دعوى نفقة لأنه مبقاش يصرف أو يسأل على البنت خالص.
تابع أحدث الأخبار عبر
