«مات وسابنا في الهم».. جيهان في محكمة الأسرة: أهل جوزي خدوا الشقة واتبلوا في القسم
بعد وفاة زوج «جيهان» واجهت غدر أهل زوجها وقسوتهم عليها وعلى أبنائها فبدل أن يقفوا بجانبهم كانوا أول من غدروا بهم وأوصلوهم للأقسام والمحاكم.
كانت «جيهان» تسعى بعد وفاه زوجها أن تربي أولادها وتعوضهم عن خسارة أبيهم، ولم يكن في بالها أنها ستصل في النهاية لمحكمة الأسرة بسبب طمع وجشع أهل زوجها الذين لم يحترموا موت أخيهم أو أن أولاد أخيهم أصبحوا يتامى وطردوهم من بيتهم وتعدوا عليهم بالضرب ، وفي النهاية وصلت «جيهان» لمحكمة الأسرة حتى تحصل على حقوق أولادها التي سرقها منهم أهلهم.
جوزي اتوفى فجأة وسابني أنا وأولاده
قالت «جيهان»: جوزي اتوفى بقاله 4 سنين، خلقت منه 3 أولاد، اتوفي فجأة مكنش عيان، مكنش في بينا مشاكل كان بيصرف وأب كويس لأولاده، لما كان عايش كان بيصرف ومش مخلي اولادي محتاجين حاجة، وأنا كنت بشتغل وأصرف عليهم واساعده، ولما اتوفى بقيت أنا اللي شايله مسئولية ولادي وبصرف عليهم وقلت هعيش وأربي ولادي وأعوضهم.
أهل جوزي اتهجموا عليا لما حاولت أدخل بيتي
تابعت «جيهان»: أنا موظفة ولما ربنا كرمني خدت شقة تانية عشان تكون قريبة من شغلي وبقيت أروح شقتي القديمة كل خميس وجمعة، وكان فيها عفش بنتي اللي شايلاه لجهازها، لحد في مرة جيت الشقة بفتح الباب لقيت الكالون متغير ومش عارفة ادخل، كلمت أهل جوزي عشان أفهم في إيه أخت جوزي وحماتي وسلفتي مسكوني ضربوني وكسروا لبنتي رجلها وكسرولي إيدي وقالولي ملكيش حاجة.
اتنازلت عن المحضر عشان مبهدلش أهل ولادي
أضافت «جيهان»: رحنا القسم عشان اعملهم محضر واتنازلت عشان مبهدلش أهل ولادي، كنت بس عايزة ادخل البيت واجيب حاجة بنتي اللي سايباها في الشقة، خفت اروح لوحدي يعملوا فيا حاجة رحت أجيب حد من القسم يروح معايا لما رحت عرفت ان اخت جوزي عملت فيا محضر اني ضربتها وعورتها وانا معملتلهاش حاجة وهي اللي كانت معورة نفسها.
أكملت «جيهان»: عملت محضر قصاد المحضر اللي عملوه لأنهم ضربونا فعلا واحنا كلنا خدنا أحكام أنا وأخت جوزي وسلفتي، من ساعتها واحنا في مشاكل بسبب الشقة ووصلنا في الأخر، أنهم اجروها وبيدوني الايجار بس انا معرفش هما مأجرين بكام أو مقعدين مين في الشقة.
تابع أحدث الأخبار عبر
