مروة بمحكمة الأسرة: جاتلي جلطة وجوزي رماني 10 سنين ومبقاش يسأل فيا أنا وأولاده
عندما تزوجت «مروة» من زوجها توسمت فيه الخير أن يكون سندها وضهرها في هذه الدنيا لكن بعد أول أزمة حدثت لها ومرضها تركها وحدها دون سؤال ولم يقف بجانبها أو حتى مع أولاده لمدة سنين عديدة.
تزوجت «مروة» في أول حياتها من زميل لها في عملها وبعد قصة حب جعلها تظن أنه سيكون سندها وضهرها في هذه الدنيا لكن اكتشتفت في النهاية أن كل وعوده كانت كاذبة، "جوزي أول ما تعبت رماني أنا وولاده ومسألش فينا، وفي الأخر رفض أنه يصرف علينا بحجة أنه هيتجوز" هذا ما قالت «مروة» عن سبب تواجدها أمام محكمة الأسرة.
اقرأ أيضا
اتجوزت حب حياتي وافتكرته هيكون سندي
قالت «مروة»: اتجوزت من 15 سنة، جوزي كان واحد زميلي في الشغل، كان في بينا قصة حب واتجوزنا وخلفنا بنتين تؤام وولد، الحياة بينا في أول سنين الجواز كانت عادية والمشاكل كانت الطبيعية بين أي زوجين، مكنتش أتوقع أنه ممكن يعمل معايا كدة.
سابني عند أهلي 10 سنين أول ما جتلي جلطة
تابعت «مروة»: من 10 سنين تعبت وجاتلي جلطة جوزي خدني أنا ولادي ساعتها ووداني عند أهلي ومن ساعتها مشي وراح قعد عند أهله، طول السنين دي بنتحايل عليه ونقوله تعالى بص على عيالك يتحجج ويقول مش فاضي، كان بيبعتلي مصاريف أكل وشرب قليلة لفترة وبعدين بطل.
جوزي مرضيش يشيلني وأنا عيانة
تابعت الزوجة: جوزي مرضيش يشيلني وانا عيانة كنت بشتغل وبطلت اشتغل من بعد الجلطة ومبقاش معايا أصرف على ولادي، وهو أول كام سنة كان بيديني بس 100 جنية وبعد كدة زودهم ل 1500 بعد مشاكل كتير معاه، دفع ال1500 لمدة 3 شهور بس ووقف ولما كلمته قالي انا هتجوز ومش هدفع حاجة تاني ليكي ولا لعيالك.
كنت هقعد عيالي من المدرسة بسبب أن مفيش فلوس
أضافت «مروة»: طول السنين دي أنا أعده عند أمي وهي بتساعدني مع اللي بيدهوني لكن دلوقتي هو اتجوز ورافض يصرف عليا أو على أولاده، اشتكيت لأهله مكنوش بيقفوا معايا بياخدوا صفه بس مبيسألوش على العيال، كنت هقعد ولادي من المدرسة عشان الظروف ومفيش فلوس لكن صعبوا عليا، ورفعت عليه دعوى نفقة وطلاق من 5 شهور، النهاردة في جلسة طلاق الضرر قالوا عاوزين شهود واحنا مفيش شهود وحولتها لدعوى خلع، الناس شاهدة انه كان سايبنا 10 سنين، بس محدش راضي يجي المحكمة يشهد.
تابع أحدث الأخبار عبر
