«كان بيجيب الحريم وأنا موجودة».. أسماء في دعوى خلع: بيصرف فلوسه على المخدرات والستات
عاشت «أسماء» حياة طيبة وهي في بيت أهلها، بعد وفاة والدها ربتها أمها وتحملت الشقا والتعب في سبيل راحة وسعادة ابنتها، وعندما كبرت وحلمت بدخول بيت الزوجية ظنت أن حياتها ستبقى بنفس الشكل ولكن ما رأته كان لا يتحمله أي بشر.
في سن الـ19 تزوجت «أسماء» وغرقها عريسها هي وأهلها في وعود كثيرة أنها ستصبح أميرة في بيتها وسيجعلها لا تحمل هم في حياتها معه، لكن بعد الزواج اكتشفت أن كل وعوده كانت كاذبة ولا يستطيع تحقيق أي منها، وبعد 4 سنوات زواج وهي مازالت في مقتبل عمرها وجدت نفسها أمام محكمة الأسرة ومازالت لا تصدق ماحدث معها في زواجها وكيف تحول هذا الشخص لوحش مدمر دمر حياتها.
اقرأ أيضا
من بعد الجواز بهدلني وطلع عيني
قالت «أسماء»: اتجوزت وانا عندي 19 سنة ومتجوزة بقالي 4 سنين وخلفت طفلين، والدي متوفي من زمان ومليش غير أمي، لما جوزي اتقدملي كنت صغيرة ومعرفش حاجة في الدنيا، وهو أعد يقولي كلام أنا وأمي إنه أزاي هيريحني ويعيشني أحسن عيشة واتخدعنا فيه وفي وعوده، كنت عارفة انه من قبل ما اتجوز انه بيشرب مخدرات لكنه كان وعدني هيبطل لكن ده كان زي كل وعوده كذب مش أكتر.
تابعت الزوجة: من بعد الجواز والخلفة اتبدل وبقى واحد تاني بهدلني وطلع عيني، مشاكلنا في الأول كانت على المصاريف انه مش عايز يصرف عليا ولا على عياله، بس كنت بعيش باللي هو بيدهوني وبستحمل، لحد ما شربه للمخدرات زاد كتير عن الأول وبقى مش بس حشيش، بقىى يتعاطى مخدر الآيس ومن ساعتها بقى العذاب بدأ.
اقرأ أيضا
كان بيحط السكينة على رقبتي وهو شارب
أكملت «أسماء» وهي تمسح دموعها: وهو شارب كان بيبقى مش في وعيه وواحد تاني، كان بيحط السكينة على رقبتي وعايز يموتني، وبيضربني لحد ما أكون هموت في ايده، احنا كنا عايشين في بيت عائلة وأهله كانوا بيتدخلوا في كل حاجة وبياخدوا صفه دايما، بيصرف فلوسه على المخدرات والستات، كان بيجيب ستات البيت وأنا موجودة ويقولي اعملي اللي تعمليه، ولما اشتكيت لأهله قالولي راجل ويعمل اللي هو عايزه.
قالي ادفعي فلوس الماذون عشان اطلقك.
أضافت «أسماء»: بقالي سنة سايباه بسبب لأخر حاجة عملها معايا، والدتي كانت تعبانة وملهاش غيري كنت عايزة اروح اشوفها كان شارب مخدرات ومرضيش يخليني اروحلها ومسكني ضربني هو وأهله عشان اتخانقت اني عايزة اروح لآمي، لما تعبت منه وطلبت الطلاق قالي ادفعي فلوس الماذون عشان اطلقك، واتنازلي عن كل حاجة، رفعت عليه دعوى خلع عشان أخلص منه، لما عرف إني رفعت قضية مسك الشقة وكسرها ودلوقتي خاطف مني العيال، وبيخلي ابني يجبله المخدرات.
تابع أحدث الأخبار عبر
