هسيبه زي البيت الوقف.. عزة في دعوى نفقة: ولاده خلوه طردوني من بيتي
"وجوده من عدمه مش فارق معايا".. هذا ما وصل له حال «عزة» بعد زواجها، وكان السبب في وصولها لمحكمة الأسرة، افتراء أولاد زوجها عليها الذي لم ترَ منه أي شر، ولكن لم ترَ من أولاده أي خير، وأوصلها أولاد زوجها إلى أنها الآن لا تستطيع تحمل زوجها ولا العيش معه.
تم تطليق «عزة» من زوجها الأول أبي أولادها منذ 25 سنة، وكانت تعيش لتربي أولادها، ولكن بعد زواج أولادها واطمئنانها عليهم في بيوتهم مع من اختاروا أن يكملوا حياتهم معهن، وجدت نفسها وحيدة في هذه الدنيا في سن كبيرة، فتزوجت «عزة» من جارها الأرمل، وظنت أنهما سيكونان ونسا لبعضهما بعد كبر سنهما، ولكن أولاد زوجها حولوا حياتها لجحيم، وجعلوها تلجأ في النهاية لمحكمة الأسرة حتى تتخلص من زوجها ومن عذابها معه.
اتطلقت من 25 سنة بسبب المشاكل وعدم الاتفاق
قالت «عزة»: اتجوزت أول مرة من 27 سنة، وخلفت من جوزي الأول بنت وولد، ومن بعد جوازي منه على طول اكتشفت ان الحياة معه كانت مستحيلة، مشفتش معاه غير البهدلة بسبب المشاكل وعدم الاتفاق، اتطلقت منه من 25 سنة، وكان طلاق ودي، وولادي كانوا معايا وعشت عشان أربيهم وأكبرهم.
اتجوزت بعد ما اتطمنت على ولادي
تابعت «عزة»: بعد ما اتطلقت بـ 25 سنة، وربيت ولادي وكبرتهم وجوزتهم، وبقى كل واحد في بيته وبقيت جدة، اتقدم لي واحد جاري كان راجل كبير وأرمل وعنده أولاده برضوا كبار زي ولادي، كان راجل محترم وكويس وطيب، مكنش بيعمل معايا أي مشاكل معايا، ومشفتش منه حاجة وحشة.
عيال جوزي خلوه ساب لي البيت
وأضافت «عزة»: اتجوزته من 2020، وهو اللي ساب لي البيت من قريب، أولاده كانوا مبهدلني من ساعة ما اتجوزت أبوهم، وكنت بستحمل عشان هو كويس معايا، لحد ما آخرتها أقنعوه إنه يسبني، وطردوني من بيتنا، وخدوا كل حاجتي ومبقاش معايا حاجة خالص من اللي اتجوزت بيها.
أنا مش بتاعت محاكم لكن هما السبب
أنهت «عزة» كلامها وقالت: أول مرة آجي المحكمة، أنا بحل كل حاجة تخصني ودي، لكن هما اللي وصلوني لكده لما رفضوا يدوني حقي، رفعت عليه دعوى نفقة ومرفعتش خلع، مش هتطلق هسيبه زي البيت الوقف، هو مبقاش فارق معايا خلاص بعد ما سابني.
تابع أحدث الأخبار عبر
