موتني من الضرب والسبب حرف M.. نوران: جوزي نقلي عدوى بسبب علاقاته الحرام
إذا نظرت إليها للمرة الأولى قد تبدوا لك امرأة قوية في عنفوان الشباب تنتظر إحدى صديقاتها، لكن بالاقتراب منها والاستماع إليها تكتشف أنك أمام بقايا أنثى أنهكتها الحياة ودمرتها أيام قاسية في ظل رجل قاس لايرحم حوله منزل الزوجية إلى سلخانة للضرب والتعذيب والشك.. عاشت «نوران» في جحيم لاينتهي بعدما اتهمها زوجها صراحة بالخيانة دون دليل وتهديدها بأخذ فلذة كبدها إن فكرت في الطلاق لتعيش بين نارين.. البقاء مع زوج مجنون والانفصال وفقدان طفلها وبينهما مأساة لا تنتهي.
«نوران»: جوزي مستحملنيش في تعبي وبيتهمني في شرفي
قالت «نوران» في بداية حديثها: اتجوزته في 2018 كان عندي 20 سنة، كنت بالنسبة له زي التليفون يحطني مطرح ما يحب ويعمل اللي عايزة وأنا معترضش، من أول الجواز وأنا تعبانة وكان عندي ورم كبير على المبيض وكان لازم أشيله وعملت عمليات وأمي هي اللي كانت بتشيلني، لما تعبت طاقة جسمي قلت ومبقتش قادرة أقوم بالبيت وأنضفه واشيله بس على قد ماربنا يقدرني كنت بعمل اللي أقدر عليه لكن مش زيي ما كنت سليمة وهو كان بيعايرني بمرضي ويقولي انتي عيانة وأنا مستحملك.
تابعت «نوران»: من زمان كل لما بيلاقيني بتكلم في التليفون يتهمني أنى بكلم رجالة وبخونه ويموتني من الضرب وهو من أول الجواز وأنا عارفة بيعمل علاقات مع ستات تانية وكنت بعمل نفسي مش واخدة بالي وبفوت عشان ماكنتش بتضرر لكن دلوقتي الضرر وصلي، من 3 أسابيع اكتشفت إنه نقلي عدوى بسبب علاقاته مع ستات تانية وتعالجت من الفيروس لكن بالرغم إنه نقلي المرض اتهمني إني واحدة مش كويسة والمرض ده جالي من حد تاني وأنا اللي بخونه مش لاقيه أي مبرر هو ليه بيقول علي كده وهو عارف كويس أنى مش كده.
أضافت الزوجة المحطمة: عمري ما كنت وحشة معاه بالعكس هو اللي كان بيضربني من زمان وأنا بستحمل واسكت ولما عرفت إنه بيشرب مخدرات وقفت جنبه وعالجته ومسبتوش، معايا ولد عنده 4 سنين ودايما مخوفني أنه هياخده مني، مش قادرة اسيبه خايفة هيعمل فينا إيه انا وابني لو مشيت، رفعت قضية ولاية تعليمية لأبني عشان أقدر أدخله المدرسة لأنه رافض أنه يدخل إبني المدرسة أو يصرف عليه.
أنهت «نوران» حديثها ومسحت دموعها وقالت: وأنا نازلة النهاردة اتهمني إني بكلم حد في التليفون وضربني علقة موت وأنا كنت بكلم المحامي وافتكر حرف الـM المنقوش بالحنة في يدي أول حرف من عشيقي المجهول، لكن ده حرف ابني، وقالي: لو عايزة تطلقي اتنازلي عن كل حاجة ووافقت لكنه مرحمنيش، مش عارفة اعمل إيه ولا أروح فين محدش بيقدر يقف قدامه لا أمي ولا اختي ومليش حد يقف معاي وأنا لوحدي عايشة معاه في رعب.
آثار التعذيب على يد نوران
