«الأول حرمني من الخلفة.. والتاني عشت معاه 3 شهور بس».. «أمينة» تحكي قصة زواجها 3 مرات
مرت «أمينة» بتجارب صعبة منذ أن بلغت الـ١٩ من عمرها، فزواجها الأول انتهي وترك علامة في حياتها، ووجدت نفسها مطلقة في سن العشرين، وعندما حاولت مرة أخرى الزواج لم توفق أيضا، بالرغم من تجاربها التي فشلت. صممت «أمينة» أن تحاول وتبحث عن سعادتها مع شريك حياتها.
«اتجوزت ٣ مرات وربنا نصفني في أخر جوازه».. هذا ما قالته «أمينة» في أول حديثها عن قصتها التي بدأت منذ أن كانت في الـ١٩ فتزوجت من قريب لها، واكتشفت أنه عقيم وكان حلم الأمومة أقوي من تحملها للظروف، فقررت رفع دعوى طلاق ضرر على زوجها، وتزوجت مرة أخرى وتحقق حلمها في الأمومة لكن مقابل ذلك عاشت فقط مع زوجها ٣ أشهر، وفي زواجها الثالث وافقت أن تكون زوجة ثانية، وبالرغم من كل ما مرت به مازالت أم حنونة وسيدة صبورة تسعى دائما لحياة أفضل لها ولابنها.
جوزي الأول حرمني من الخلفة
قالت أمينة: «اتجوزت أول مرة من ٢٤ سنة كان قريبي وبعد فترة من الجواز اكتشفنا أنه مبيخلفش، كان كويس معايا بس أنا كنت صغيرة كنت عايزة اخلف، وهو كان رافض يتعالج، لما طلبت منه الطلاق رفص واضطريت ألجأ اني ارفع دعوى طلاق للضرر لأنه مكنش بيخلف، ومش عايز يتعالج أو يطلقني ودي، واتحكملي فيها واطلقت فعلا.
عشت مع جوزي التاني ٣ شهور بس
تابعت أمنية: «اتجوزت تاني وكان أكبر مني بـ ١٣ سنة، اتجوزته بس عشان أخلف، ومقعتدش معاه غير ٣ شهور، كان اكبر مني وارمل وأنا كنت خارجة من تجربة فاشلة ومتعقدة، حصل بينا مشاكل من أول الجواز لكن الحمد لله حملت وخلفت وجبت ابني، حمدت ربنا على نعمته، وقررت اني اطلق عشان مكنش ينفع أكمل معاه بأي شكل، سيبنا بعض ومرجعناش تاني واطلقنا ودي».
أهم حاجة عندي في حياتي ابني يكون مرتاح
أكملت أمينة: «جوزي التالت كان قصة حب، اتعرفت عليه في شغل، أنا كنت زوجة تانية، وافقت وعيشت واتجوزنا وابني عايش معايا، محبتش أني اخلف تاني عشان ميبقاش لكل أبن أب مختلف، فمخلفتش من جوزي التالت خالص، بقالنا ١٧ سنة مع بعض، بنتخانق ونرجع مش قاعد معايا على طول بس الدنيا ماشية الحمد لله، أهم حاجة عندي في حياتي أن ابني يكون كويس ومرتاح في حياته، وجيت محكمة الأسرة اخلص ورق يخصه.
