نيفين للقاضي: «في الشتا بيقلعني هدومي ويدلق عليا ميه مثلجة»
سنة واحدة كانت كفاية لـ «نيفين» أن تكتشف حقيقة ابن عمها وزوجها، التي اخبتها عنها عائلتها قبل زواجها منه، هربت «نيفين» من بيت زوجها والجروح تملئ جسدها وقلبها، وعندما تأكدت أنها إذا أكملت معه سينتهي بها الأمر جثة.
كانت «نيفين» فتاة في سن ال 17 عندما تقدم ابن عمها لخطبتها ووافقت عليه لأنها كانت تريد أن تصبح عروسة مثل باقي البنات، لكن عريسها كان يرتدي قناع الشخص المحترم والمتزن أمام الناس ولكنه في الحقيقة غير ذلك تماما، بدأت عيوب عريس «نيفين» تظهر منذ خطوبتها وعندما توجهت لأهلها لتشتكي لهم لم يقفوا بجانبها ويصدقوها، ولازالت «نيفين» تتسأل حتى الآن إذا صدقها أهلها هل كانت ستلجأ في النهاية لمحكمة الأسرة لتنهي حياتها مع زوجها.
اقرأ أيضا
«نيفين»: كنت صغيرة وطائشة وعندت مع أهلي وتجوزت
قالت «نيفين»: “اتجوزت في 2015 من ابن عمي أتخطبت 3 سنين كنت 17 سنة بس، ولما اتجوزت عشت معاه سنة بس، قبل الجواز كان ملاك وشخص مثقف جدا ، كنت تعدي معاه تحسي إنك قاعدة مع حد فاهم وعاقل، ميبانش عليه أي حاجة تانية، من الخطوبة وهو كان بيغلط فيا ويشتمني ولما أشتكيت لأهلي قالولي مش هينفع تسيبيه وهو أكيد مش قصده، وقبل الفرح بوقت صغير بدأ يغلط في أهلي كمان لما الغلط وصلهم هما قالولي سيبيه، عندت معاهم ورفضت اسيبه كنت صغيرة وطايشة”.
«نيفين»: أهلي خبوا عليا ان العريس بيشرب مخدرات
تابعت «نيفين»: “حقيقته بانت بعد الجواز بـ3 شهور بس، لما اكتشتف انه بيتعاطى مخدرات، عرفت لما لاقيت الحجات دي في البيت وعرفت من صحابه انه بيشرب مخدرات معاهم، أهله اللي هما أهلي كانوا عارفين من قبل ما نتجوز أنه بيشرب مخدرات ومحدش قالنا، واجهته ساعتها ومن وقتها والعذاب معاه بدأ ضرب وإهانة طول الوقت”.
اقرأ أيضا
«نيفين»:في الشتا بيقلعني هدومي ويدلق عليا ماية متلجة
أكملت «نيفين»، حديثها عن عذابها مع زوجها قالت: “كان بيتعاطى ترامدول ويشرب حشيش، الضرب كان بسبب ومن غير سبب وكان ضرب يموت مش ضرب عادي، وصل بيه لدرجة كان في الشتا بيقلعني هدومي ويدلق عليا ميه متلجة ، لحد ما في مرة ضربني بالسكينة وكان عايز يموتني عشان كان عايز فلوس للمخدرات، الضربة جات في وشي، من وقتها قررت اسيبه ومرجعلوش تاني عشان عرفت خلاص انه مش هيسبني غير لما يموتني، لما ضربني بالسكينة سابني لوحدي ومشي وقفل عليا بالمفتاح واضطريت انط من السطح عشان أهرب”.
أنهت «نيفين» “كلامها والدموع في عينيها على ما مرت به في حياتها وقالت: سيبته ورجعت لأهلي وطلبت منه الطلاق مرضيش يطلقني عشان معرفش اتجوز تاني، دلوقتي رفعت عليه دعوى خلع عشان أخلص منه للأبد”.
تابع أحدث الأخبار عبر
