أخبار محكمة الأسرة اليوم
أمير لـ محكمة الأسرة: خدت عفشها وحاجتها واتهمتني إني سرقتها
كان أمير على أبواب محكمة الأسرة يبحث عن حل لمشكلته مع زوجته التي لم تصون بيتها وأسرتها ودمرت مستقبل أسرتها دون سبب أو مبرر، بعد خلاف عادي وارد حدوثه بين أي زوجين تركت الزوجة زوجها وأخذت جميع حقوقها المادية التي لم يمنعها زوجها عنها وعندما ترك الزوج زوجته كان يأمل أن يكون انفصل عنها ويبقى بينهم المودة والرحمة ولكن ما وجده هو الغدر والقسوة الذي كانوا سبب وصوله لمحكمة الأسرة.
قصص محكمة الأسرة.. اتجوزت مراتي عن طريق جواز الصالونات
قال «أمير» في بداية حديثه: «أنا اتجوزت مراتي في 2015 وخلفت منها ولد وبنت، كان جواز صالونات أهلي كانوا يعرفوا أهلها من بعيد ولما دخلنا بيتهم كانوا ناس كويسة وشكلهم طيبين ومحترمين بس مكنتش أعرف أنهم هيعملوا كدة في الأخر».
حكايات محكمة الأسرة.. حاولت أصالح مراتي عشان ولادي
تابع «أمير» حديثه قائلا: «المشاكل بيني وبين مراتي بدأت من زمان وكانت بتبقى لأسباب بسيطة وبتتحل بينا أنا وهي، وأنا كنت بعدي وأكبر دماغي عشان خاطر ولادي، وفي الخر حصل بينا مشكلة وسابت البيت ساعتها وحاولت أصالحها إنها ترجع وتعد في البيت لكن هي رفضت».
دعاوي محكمة الأسرة.. رفضت ترجع أو تخليني أشوف العيال
أضاف الزوج لكلامه: «لما مشيت خدت العيال وكل حاجة معاها، بعد يومين ما سابت البيت بعتت حد من أهلها ياخد كل حاجة تخصها وتخص العيال خد قايمتها وحجات من العفش وأنا مش موجود، وقتها معملتش حاجة واستنيت شوية لحد ما الدنيا تهدى وحاولت أكلمها كتير وأصالحها عشان خاطر العيال ميتبهدلوش لكن هي كانت رافضة ترجع او تخليني أشوف العيال قلت خلاص خلينا نطلق بس يكون باقي بينا الاحترام».
قضايا محكمة الأسرة.. رفعت عليا قضية وخدت حكم
أنهى «أمير» حديثه قائلا: «لحد ما عرفت أنها رفعت قضية تبديد منقولات واتهمتني أني سرقت العفش والقايمة وخدت حكم عليا وهي واخدة كل حاجة من البيت مسابتش حاجة وكل حاجة كانت حقها ومش حقها خدتها وجيت المحكمة عشان أعرف مصير القضية ايه، وأرفع قضية رؤية عشان أعرف أشوف عيالي اللي هي مانعاهم عني وحرماني منهم».