أخبار محكمة الأسرة اليوم
معندوش شخصية.. فاطمة لـ محكمة الأسرة: كلام أخوه عنده مقدس وبسببه بيتنا اتخرب
تواجدت "فاطمة" في محكمة الأسرة عكس العديد من السيدات فلم يكن زوجها هو السبب بل أخيه، تزوجت فاطمة وكان أملها أسرة مستقرة وحياة طبيعية ولكن ما واجهته في زيجتها كان أصعب بكثير، كان الزوج ضعيف الشخصية تمامًا أمام أهله، ولم يقدر زوجته أو يحترمها واستمر في سماع كلام أخيه حتى دمر أسرته تاركًا زوجته وحدها أمام أبواب محكمة الأسرة تبحث عن حل لمشاكلها عسى أن تجده في يوم من الايام.
قصص محكمة الأسرة.. اتجوزت واحد قريبي من البلد
قالت «فاطمة» في بداية حديثها : «أنا اتجوزت من 8 سنين كان قريبي من بعيد واحنا كنا عايشين في نفس البلد ونعرف بعض من قبل الجواز، هو كان طيب جدا ومحترم ولما اتقدملي وافقت عليه على طول أنا وأهلي عشان وثقنا فيه وقلنا محترم، اتجوزت وخلفنا ولد وحمدت ربنا وكنا عايشين حياة طبيعية».
حكايات محكمة الأسرة.. أهل جوزي مبيحبونيش
تابعت «فاطمة» حديثها قائلة: «المشاكل بدأت بعد الجواز، اتجوزت في بيت عيلة زي بقيت الناس في البلد عندنا ومن أول ما اتجوزت وأهل جوزي مش بيعاملوني كويس كانوا مبيحبونيش، وكان بيفضلوا سلفتي عليا وأنا استحملت وقلت معلش عشان خاطر جوزي وابني اللي خلفناه».
دعاوي محكمة الأسرة.. طردوني من بيتي ظلم
أضافت الزوجة: «حصل بينا مشاكل كتير أنا وسلفتي كانت بتتلكك عشان تعملي مشكلة وتتخانق معايا من ساعة ما اتجوزت، أخر مشكلة اتهموني اني عملت مشكلة نقلت كلام كذب وأخو جوزي هو اللي اتهمني؛ وأنا مكنتش عملت حاجة جوزي صدقهم وموقفش معايا وفضلوا ورايا لحد ما طردوني أنا وابني من البيت، جوزي فضل ماشي تحت أمر أخوه اللي كان عارف إني مظلومة وسلفتي هي سبب المشاكل وخلى جوزي يطلقني والاهل كلهم كانوا واقفين معاه، وبرضو معرفتش ارجع لبيتي مع إني مكنتش عايزة اطلق».
قضايا محكمة الأسرة.. دعوى نفقة
أنهت «فاطمة» حديثها قائلة: «جيت المحكمة عشان ارفع قضية نفقة عشان حق ابني اللي رموه جوزي وأهله ومسألوش فينا وكل ده بسبب ظلم أخوه ومراته».
تابع أحدث الأخبار عبر
