أخبار محكمة الأسرة اليوم
محكمة الأسرة ..سهى: ماشي ورا الرقاصة ومبيسألش فيا أنا وعياله
تواجدت «سهى» في محكمة الأسرة بعد تعرضها للغدر والخيانة من زوجها الذي دمر أسرتها بعدما عاشت الزوجة سنين تحاول أن تبنيها، ولكن نسى الزوج عشرة السنين وتعرف على سيدة أخرى وأصبح يصرف عليها أمواله وترك زوجته وأبنائه دون عون أو مساعدة ولم يلبي احتياجاتهم أو يكون لهم عون أو سند في الدنيا، حتى أضطر الزوجة أن تتوجه لمحكمة الأسرة حتى تبحث عن حقوقها وحقوق أبنائها التي حرمهم زوجها منهم.
قصص محكمة الأسرة.. اتجوزنا جواز تقليدي وكان مفيش مشاكل
قالت «سهى» في بداية حديثها: «أنا اتجوزت من 11 سنة خلفت من جوزي ولدين، كان جواز عادي تقليدي جوزي شافني في مناسبة واتقدملي وسألنا عليه وكان راجل كويس ومفيش منه مشاكل وافقت عليه واتجوزنا على طول وخلفنا بعدها والدنيا كانت عادية ومفيش مشاكل».
دعاوي محكمة الأسرة.. جوزي راجل بتاع ستات
أكملت الزوجة حديثها: «مكنش فيه أي مشاكل مع جوزي كان بيشتغل ويصرف عليا أنا والعيال ومش مخلينا محتاجين حاجة، وأهله مكنش ليا علاقه بيهم أوي وهما كانوا ناس كويسة ومحترمة، مشكلتي معاه بس إنه كان بتاع ستات وبيعاكسهم، بس كنت بقول لنفسي معلش وكل الرجالة كدة ومادام خلاص مبيعملش حاجة تاني وبيرجع لبيته وعياله خلاص بس كنت غلطانة».
قضايا محكمة الأسرة.. بيصرف على الرقاصة وسايب عياله
تابعت «سهى» كلامها: «لحد من فترة بدأ يتغير ويتأخر برة البيت وعلى طول معهوش فلوس وكل ما أقوله محتاجة فلوس ليا أو للعيال يغير الموضوع ويتوه وميدنيش حاجة، كنت حاسه إنه في حاجة غلط ومكنتش عارفة هي ايه فضلت ادور وراه لحد ما عرفت إنه اتعرف على رقاصة وبقى يصرف عليها كل فلوسه وسايبني أنا وعياله مبيصرفش علينا خالص».
حكايات محكمة الأسرة.. ابوه بيشهد عليه أنه بيصرف على الرقاصة
أنهت «سهى» حديثها وقالت: «لما واجهته وقلتله إني عرفت أنه يعرف رقاصة وبيصرف عليها مأنكرش وقالي إذا كان عاجبك، حاولت معاه كتير إنه يتعدل لكن مفيش فايدة مش عايز يصرف على ولاده، لحد ما جيت عشان أرفع قضية نفقة عشان أعرف أخد حقي منه وحتى أبوه معايا في المحكمة عشان يشهد ضده ويقول إنه بيصرف على الرقاصة ورامي ولاده».