أخبار محكمة الأسرة اليوم
محكمة الأسرة.. أسماء: أهلي خايفين من الفضيحة وسايبني اتهان من جوزي وعيلته
كانت محكمة الأسرة هي النهاية التي وصلت لها «أسماء» بعد سنين المعاناة التي عاشتها طوال حياتها الزوجية، التي حاولت بكل الطرق أن تتخلص منها وتنهيها لكن في كل مرة بائت محاولاتها بالفشل عندما واجهت أهلها الذي رفضوا طلاقها من زوجها الذي كانت الحياة معه مستحيلة خوفًا من كلام الناس وواجهت أهل زوجها الذين لم يحترموها وعاملوها بقسوة حتى ضاقت بها السبل فتوجهت لمحكمة الأسرة بحثًا عن حقوقها.
قصص محكمة الأسرة.. المشاكل مع جوزي بدأت من زمان
قالت «أسماء» في بداية حديثها: «أنا اتجوزت من 8 سنين، كان جواز عن طريق المعارف ومن ساعة ما اتجوزنا وانا فيه خلافات بيني وبين جوزي خلفت منه 3 أولاد وحملت على طول أول ما اتجوزت عشان كدة اضطريت أني استحمل جوزي والمشاكل اللي بينا».
حكايات محكمة الأسرة.. جوزي معندوش أخلاق ولا دين
تابعت «أسماء» حديثها قائلة: «مشاكلي معاه كانت بسبب أنه بخيل ومبيصرفش وعلى طول بيشتمني ويبهدلني وبيضربني لدرجة كان بيخنقني وكان بيتعاطى مخدرات من زمان وفلوسه كلها رايحة عليها ومفيش حاجة ليا أنا وعيالي وكنت بسكت مقدرش أقول حاجة، من ساعة ما اتجوزته كان ميعرفش ربنا ومعندوش لا دين ولا أخلاق هو وأهله».
دعاوي محكمة الأسرة.. أهل جوزي مبهدلني
أكملت الزوجة حديثها قائلة: «فوق بهدلة جوزي كان فيه بهدلة أهله، حاولت كتير معاهم أنهم يتعدلوا لكن مفيش فايدة، حماتي كانت بتردح لي في الشارع، واخت جوزي كانت بتتخانق معايا على طول، حاولت اتطلق منه بقالي سنين ومش عارفة، كل لما اسيبه واروح لأهلي يرفضوا الطلاق يقولوا عشان الفضايح وان مينفعش أطلق الناس هتتكلم عليا».
قضايا محكمة الأسرة.. بيجيب أخته غصب في الرؤية
أنهت «أسماء» حديثها: «لحد ما قررت اسيبه واطلقت منه بعد ما حاولت كتير أني أخلص منه، بعد الطلاق مبيصرفش خالص الأول كان بيصرف قليل دلوقتي مفيش خالص، ورفع عليا قضية رؤية بالرغم إني ممنعتوش من إنه يشوف العيال، بقى بيجيب أخته في الرؤية وبتقعد تتكلم بأسلوب وحش عن قدام عيالي وأنا مش عايزها بس هو بيجبها عشان يغظني، ودلوقتي رفعت قضية نفقة عشان حقي أنا وولادي».
تابع أحدث الأخبار عبر
