أخبار محكمة الأسرة
محكمة الأسرة.. حسين في إنذار طاعة: طفشت بابني وحرماني منه عشان ألف جنيه
لجأ «حسين» لمحكمة الأسرة للبحث عن حقه الذي حرمته منها زوجته، لم يرغب أبدا أن تكون هذه نهايته أو يصل لأبواب المحاكم حتى يستطيع رد زوجته لبيت الزوجية ولكن ما فعلته زوجته معه وحرمانها له من رؤية طفله الوحيد جعله مضطر أن يتوجه لمحكمة الأسرة.
قصص محكمة الأسرة.. سمعت كلام الناس واتجوزت مراتي
قال «حسين» في بداية حديثه: «اتجوزنا عن طريق جواز الصالونات الناس المعارف قالولي عليها أنها بنت ناس وكويسة سمعت كلامهم واتقدمت واتجوزنا، ومكنش يبان عليها أي حاجة وحشة أو أنها بتاعت مشاكل، ومعانا ولد 8 سنين».
حكايات محكمة الأسرة .. المشاكل مع مراتي بدأت بعد سنة جواز
تابع «حسين» حديثه قائلا: «المشاكل والخلافات مع مراني بدأت من بعد سنة تقريبا ومن بعد الخلفة، بقت على طول عايزة فلوس وانا كنت بديها مصروف على قد اللي معايا بس كان على طول مش عاجبها وعايزة زيادة وأنا مكنش بيبقى معايا يكفي طلباتها كنت بصرف على قد اللي معايا».
دعاوي محكمة الأسرة.. سابت البيت عشان ألف جنية
أضاف الزوج: «المشاكل كل مادى كانت بنزيد وتكتر وأنا كنت بعديها عشان خاطر ابني، كنت بستحمل كلامها السخيف وهي بتقول عليا مش مكفي بيتي، لحد في مرة طلبت مني ازود مصروف البيت ألف جنية ومكنتش أقدر أعمل كدة بسبب ظروفي لما قلت مينفعش حصل مشكلة كبيرة وخلصت على إني قلت خلاص هتصرف، بعد يومين لقيتها هي وابني اختفوا ومعرفش طريقها».
قضايا محكمة الأسرة.. عايزة تطلق عشان توريني ابني
أنهى «حسين» حديثه وقال : «بقالها كام شهر دلوقتي سايبة البيت ومعاها ابني ومعرفش عنها حاجة، سألت أهلها وكل اللي يعرفوها ممكن تكون راحت فين ومحدش عارف مكانها خالص، لحد ما أخوها المسافر بره مصر كلمني وقالي إنها عنده ولو عايز اشوف ابني أطلقها، جيت المحكمة عشان أعمل إنذار طاعة واعرف أجيبها هي وابني».
تابع أحدث الأخبار عبر
