"نادية" في محكمة الأسرة: أهلي واكلين حقي بقالهم 10 سنين
أمام محكمة الأسرة، اليوم الخميس، تواجدت سيدة في الستين من عمرها وهي تبكي والدموع تغرق وجهها، ويلمئ قلبها الحسرة على الطمع الذي وصل له الناس في الدنيا، والغدر الذي شهدته في حياتها من القريب قبل الغريب.
كان سبب وجود «نادية» في محكمة الأسرة هو لرفع دعوى إعلان وراثة لوالدها الذي توفى من ١١ عام، ومنذ أن توفى والدها وقعت «نادية» في طمع وجشع أهلها الذين من المفترض أن يكونوا سندها في الدنيا كانوا عكس ذلك وقسوا على أختهم ودفعوها في النهاية لأبواب محكمة الأسرة حتى تحصل على حقها.
اخواتي قسموا ورث أبويا وكلوا حقي
قالت «نادية»: أبويا اتوفى من ١١سنة، وانا كنت متجوزة وعايشة في الكويت انا وجوزي وولادي، ولما جوزي اتوفى رجعت مصر لأن مكنش معايا فلوس أعيش وأصرف على ولادي بسبب وفاه جوزي، ولما رجعت مصر لقيت ان من بعد ما ابويا مات اخواتي قسموا الورث على بعض أنا مكنتش محتاجة الورث وجوزي عايش بس لما اتوفى احتاجت الفلوس.
أهلي واكلين حقي بقالهم ١٠ سنين
تابعت «نادية»: بقالهم ١٠ سنين واكلين حقي في فلوس شقة أبويا اللي هي ورثي وحقي من أبويا ولما رجعت مصر لقيت أختي عايشة فيها والشقة متباعتش بسبب انها فيها، بالرغم ان ليها بيت ممكن تعد فيه، أهلي واقفين مع أختي مش عايزين يدوني فلوسي كل شهر يوعدوني وميدونيش حاجة، كل شهر اختي تقولي هنديكي حقك وبعد كدة تقولي احنا في ظروف عندنا وعاملين جمعية و معناش فلوس دلوقتي وكل دي حجج عشان متدنيش حقي.
اقرأ أيضا
ابني هو اللي بيشتغل ويصرف عليا لأني تعبانة
أضافت «نادية»: انا تعبانة ومحتاجة الفلوس حقي من ورث أبويا وطول السنين دي مخدتش حاجة، زوجي اتوفى من زمان وأنا اللي بصرف على أولادي التلاتة، ودلوقتي عشان أنا تعبانة فابني الكبير هو اللي بيصرف علينا، وانا جاية محكمة الأسرة عشان أعمل إعلان وراثة عشان أعرف أخد حقي وأقدر أساعده، وأهلي هما السبب إني أجي وأقف قدامهم في المحكمة لأنهم سرقوني ومش مراعيين القرابة أو اننا أهل.