أخبار محكمة الأسرة اليوم
محكمة الأسرة.. سارة: مبيصرفش على البيت ولو شاف عياله في الشارع بيعمل مش عارفهم
فقدت "سارة" الأمل وطال يأسها بسبب حال زوجها، الذي هرب من المسؤولية وتركها وأولادها دون رعاية أو اهتمام، حيث انهارت الزوجة بعد سنوات من الصبر على أمل أن ينصلح حاله في يوم من الأيام، ولكن النهاية كانت حتمية بسبب قسوته عليها وعلى أولادها رغم كل ذلك.
قصص محكمة الأسرة.. وقفت معاه عشان ظروفه وحشة
قالت «سارة» في بداية حديثها: «أنا متجوزة من 22 سنة وعندي 3 أولاد عايشين معايا حاليا وأنا وهو منفصلين بقالنا 9 سنين، كان جواز عن طريق المعارف، ناس يعرفوني قالوله عليا وهو جه اتقدم، وكانت ظروفه وحشة بس أنا قلت أقف معاه وأساعده».
حكايات محكمة الأسرة.. سكت على ظروفه وقلت هيعمل ايه
تابعت «سارة» حديثها قائلة: «قبل الجواز وقفت معاه ووضبت معظم البيت على حسابي أنا وأهلي، وبعد الجواز كان مش مكفي مصاريف أي حاجة، مكنش بيصرف غير قليل وأبويا اللي كان بيصرف عليا أنا وولادي وعمري ما اشتكيت على طول بقول ظروفه كدا هيعمل ايه».
دعاوي محكمة الأسرة.. اختفى ومعرفلوش طريق
صبرت الزوجة على حال زوجها على أمل أن يتغير للأحسن، لكنها استيقظت في يوم لتجد زوجها اختفى، دون أن تعرف له طريق.. وأضافت الزوجة: «فجأة في يوم هو اللي سابنا واختفى ومكنتش اعرف مكانه فين ولا أوصله ازاي، كان فيه بينا خلافات بسيطة وقتها بس متوقعتش أنه يمشي ويسيب البيت، وبعد فترة بقى بيظهر ويختفي بس حتى لما يرجع مبيرجعش بيته مش راضي يرجع عشان ميتحملش مسؤولية ولا يدفع حاجة».
بيعمل نفسه مش عارفنا لو شافنا في الشارع
أنهت «سارة» حديثها قائلة: «دلوقتي مبيكلمناش أصلا بنشوفه في الشارع يعمل نفسه ميعرفناش، ولما بيعوز يشوف أولاده بيكون بره البيت ومبيسألش عليهم ولا على مصاريفهم ومبيقعدش معانا أصلا، عشان كدة رفعت عليه قضية نفقة، محصلش بينا طلاق كل ده وأنا مرفعتش خلع عشان مكنتش عايزة أرفع عليه قضايا، لكن زهقت من الحياة اللي أنا عايشاها دي».
تابع أحدث الأخبار عبر
