أخبار محكمة الأسرة اليوم
محكمة الأسرة|أمينة للقاضي: "ودني وبيسمع كلام الناس وطمعان في مرتبي"
لجأت "أمينة" إلى قاضي الأسرة، للحصول على النفقة، بعدما قام زوجها بتطليقها طلقة بائنة، تاركا إياها وابنهما دون ما يساعدهما على مواجهة الحياة، وقالت للمحكمة إنه طلقها وترك لها المنزل دون سابق إنذار.
وقالت «أمينة» في بداية حديثها: «أنا متجوزة جواز صالونات من سنتين ونص، وخلفت ولد واحد بس ومتطلقين بقالنا أسبوعين بس طلقة بائنة، عيشت معاه سنتين ونص كلهم مشاكل، أنا اتعرفت عليه عن طريق ناس أصدقائي وكان كويس جدا وميبانش عليه أي حاجة وحشة وهو فعلا بني أدم محترم جدا».
حكايات محكمة الأسرة.. جوزي بيسمع كلام الناس
تابعت «أمينة» حديثها قائلة: «مكنش في مشاكل كبيرة بيني وبين جوزي والدنيا ماشية، بس هو كان ودني وبيرمي ودانه للناس سواء قرايبه أو صحابه، بيسمع كلامهم في كل حاجة يقولوها، وكل حاجة ينصحوه بيها ينفذها على طول حتى لو غلط».
دعاوي محكمة الأسرة.. معاه فلوس وعايز ياخد مرتبي
أضافت الزوجة: «أخر مشكلة حصلت بينا كانت بسبب إنه شايف إن مرتبي حقه، وأن المفروض هو اللي ياخده ويبقى معاه بالرغم إنه مرتاح ماديا ومعاه فلوس، وغلط فيه وفي أهلي وسابني أنا وابني لوحدنا في البيت ومسألش فينا ولا يعرف عننا حاجة، وبقاله دلوقتي 3 شهور معرفش حاجة عنه، أنا عارفة هو ساب البيت ومشي عشان في ناس قالوله عشان تعرف قيمتك سيبلها للبيت وهي هتعرف قيمتك وترجعلك".
قضايا محكمة الأسرة.. رفعت خلع ونفقة عشان اخلص من جوزي
أنهت «أمينة» حديثها قائلة: «من ساعة ما مشي معرفش عنه حاجة فاكرني هجري أصالحه عشان أرجعله، أنا مبقتش عايزاه بالذات لأنه ضربني في أخر مرة حصل بينا مشكلة، وكانت تاني مرة يضربني فيها، ورفعت عليه قضية خلع ونفقة عشان أخلص من الحياة معاه».
تابع أحدث الأخبار عبر
