أخبار محكمة الأسرة
محكمة الأسرة .. سمية: اتجوز عليا بنت 25 عشان يخلف ولد بدل ابننا المتوحد
أمام محكمة الأسرة تواجدت «سمية» ومعها أولادها من زوجها الذي تركهم دون سؤال وتخلى عنهم لرغبته في إنشاء أسرة جديدة وينسى أسرته القديمة، عندما تزوجت «سمية» لم تتوقع أن ينتهي بها الأمر في محكمة الأسرة بسبب زوجها وبعد تحملها له وعدم صرفه عليها لسنين عديدة، ولم يقدر الزوج أي من تضحيات زوجته أو عشرة السنين بينهم وتزوج من أخرى حتى يحقق حلم إنجاب الولد.
قصص محكمة الأسرة
قالت «سمية» في بداية حديثها: «أنا متجوزة من 20 سنة قعدت مع جوزي 18 سنة وسيباه من سنتين معايا منه 4 أولاد، في الأول كان كويس ومكنش في مشاكل، مشكلتي معاه أنه مبيصرفش خالص غير على القد، فضلت سنين عايشة معاه كل لما اكلمه يقولي مش معايا فلوس، وأنا كنت بشتغل وأصرف عشان أمشي الدنيا ومعملش مشاكل.»
حكايات محكمة الأسرة
أكملت الزوجة كلامها: «أنا خلفت من جوزي 3 بنات وهو كان عايز الولد ولما جبت ولد طلع عنده توحد حمدت ربنا، بس هو مكنش عاجبه وكان عايز يخلف تاني وانا رفضت أخلف تاني لأنه مبيصرفش علينا وأنا اللي شايلة البيت، عشت معاه واتحملته ومكنتش بتكلم.»
دعاوي محكمة الأسرة
تابعت «سمية»: «لحد ماهو سابني أنا والعيال ومشي، مكنش أعرف راح فين ولا بيعمل ايه، لحد من بعد ما سابني عرفت أنه اتجوز بنت عندها 25 سنة وهو عنده 40 سنة اتجوزها عشان عايز يخلف عيل مش مريض، من ساعة ما اتجوزها مببيسألش فينا ولا بيصرف علينا أي حاجة أكتر من الأول»
قضايا محكمة الأسرة
أنهت الزوجة حديثها وقالت: «رفعت عليه قضية طلاق ضرر لأنه لما طلبت منه الطلاق قالي عايزة تطلقي أدفعي حق المأذون، وفعلا جبت المأذون وجهزت الفلوس قالي مش جايلي مزاج أطلقك، مش عايز يطلقني وعايز يسبني متعلقة رفعت عليه القضية بقالي سنتين، ومن ساعة ما مشي وساب عياله ومبيسالش فيهم ولا بيصرف، وبيأذيني أنا والعيال مش مكفيه اللي بيعملوا فينا بقى بيقول للصيدلي ميديناش العلاج لأبني العيان عشان يعاقبني، وهرفع عليه قضية نفقة.»
تابع أحدث الأخبار عبر
