«عاوز ولد».. ريهام في دعوى نفقة: طلقني بعد 10 أيام من خلفة بنتي
توقعت «ريهام» أنه عندما يرزقها الله بنعمة الأطفال ستكون أسعد أيام حياتها، لكن زوجها حول هذه الذكرى التي من المفترض أن تكون ذكرى سعيدة لذكرى مؤلمة تذكرها يجلب لها ألم وحزن.
كان سبب تواجد «ريهام» في محكمة الأسرة هي أفكار زوجها الرجعية ورغبته في إنجاب أولاد فقط وعدم رغبته في إنجاب بنات، وبعد إنجاب الزوجة بنت لم يسأل عليها أو على ابنتهم منذ ولادتها، واضطرت «ريهام» بعد فشل كل محاولتها في الوصول لحل ودي مع الزوج أن تلجأ لمحكمة الأسرة كطوق نجاة أخير تتعلق به عسى تجد حل لمشكلتها.
كان نفسه يخلف ولد
استهللت «ريهام» حديثها وقالت: اتعرفت على جوزي في الشغل وكان جواز عن حب، في فترة الخطوبة كان كويس جدا ومفيش مشاكل بينا، اتجوزنا وبرضو كان مفيش أي مشاكل بينا غير المشاكل العادية وكانت بتتحل بسرعة، كان هو اللي بيشتغل ويصرف على البيت ومكنش مخليني نفسي في حاجة، ولما حملت كنا فرحانين جدا، وهو كان نفسه في ولد أكتر من أي حاجة من ساعة ما عرف إني حامل.
طلقني بعد الولادة بعشر أيام
لم تعلم «ريهام» عندما حملت في طفلها أن رغبة زوجها في إنجاب ولد ستكون شديدة للدرجة التي وصل لها…تابعت «ريهام»: عيشت مع جوزي سنة بس، طلقني بعد ما ولدت وبنتي عندها 10 أيام، أنا كنت عارفة إنه عايز ولد بس ميوصلش لدرجة دي، ولما عرفت أوصله وكلمته قالي أنا مبخلفش بنات ومش عايز بنات.
دعوى نفقة ومتجمد نفقة
أضافت «ريهام»: من ساعة ما طلقني مسألش علينا ولا شاف بنته وطبعا مبيصرفش علينا خالص، رفعت عليه قضية نفقة بعد ما حاولت كتير معاه ودي إنه يصرف علينا لكن مفيش فايدة معاه ورافض قالي روحي المحاكم وارفعي قضايا، بعد ما كسبت قضية النفقة مبقاش بيدفع، وبيرشي المحامين والناس اللي بيعملوا تحريات كل ده عشان ميصرفش على بنته، ودلوقتي رفعت دعوى متجمد نفقة ومعايا حكم حبس، ومفيش عنده حل غير الدفع أو الحبس، مكنتش عايزة نوصل للنهاية دي هو برضو أبو بنتي، بس هو السبب اللي وصلنا للمحاكم.
تابع أحدث الأخبار عبر
