"الستات والمخدرات".. مروة في دعوى نفقة: "أنا اللي دفعت حق المأذون عشان أخلص منه"
في سن الـ 18 كانت تحلم مروة بأن تكون أم ولديها بيت وأسرة وعندما تزوجت ظنت أن حلمها سيتحقق ولكن تأتي الرياح بما لا تشتيه السفن، فمنذ زواجها وكانت الحياة مع زوجها يملأها الألم والحسرة.
" الحمدلله سيبته كويسة أنا وعيالي" هذا ما قالته «مروة» في أول حديثها عن زوجها الذي لم ترى من حياتها معه سوى الخيانة والألم، حاولت الزوجة أن تتحمل طبع الخيانة في زوجها ولكنها اكتشفت أن زوجها مدمن للمخدرات وحاولت الزوجة أن تعالج زوجها حتى تحافظ على بيتها وعلى أولادها ولكن بائت كل محاولتها بالفشل وتم الطلاق بينها وبين زوجها ودي ووصل بها الأمر أن تدفع هي حق المأذون ليتم الطلاق، ووصلت بها السب في النهاية لمحكمة الأسرة حتى تحصل على حقوقها.
صحاب السوء سبب تدمير حياتنا
قالت «مروة»: أنا متجوزة 2011 واتطلقت 2019، مش قرايب صاحب جوز اختي، كنت 18 ونفسي ابقى ام واخلف وفرحت لما اتجوزته، جوزي لما خدته كان كويس ومفيش بينا مشاكل وعادي بيشتغل ويصرف عليا وعلى ولاده، لحد ما تلم على صحاب السوء ومن ساعتها بقى واحد تاني، ودمر حياتي أنا وولاده.
بيخوني مع ستات من على النت
تابعت «مروة»: اكتشفت بعد كدة ان جوزي كان بيخوني مع ستات كتير بيعرفهم من على النت، عرفت انه بيخوني لما بنتي الصغيرة فتحت تليفونه ولقت عليه صور ستات مش كويسة و بيكلم ستات على التليفون، ساعتها لما واجهته وقلتله مينفعش اللي بيعمله ده مسكني ضربني علقة موت.
وعدني هيتغير وكذب عليا
أضافت «مروة»: اتطلقت منه لما عرفت كدة ولما لاحظت ان طريقته اتغيرت وبقى كلها عنف وبهدلة، لكن اكتشفت بعد كدة انه بيتعاطى مخدرات، اتحجز في المصحة ووقفت معاه ومسيبتوش ورجعتله لما وعدني انه هيتغير وخلفت ولد و من ساعتها رجع تاني لحاله في الأول.
أهله بيقوا معاه
أكملت «مروة»: اتعدل خمس شهور بس بعد ما خرج من المصحة وبعدين رجع تاني زي الأول يعرف ستات ومضيع فلوسه على المخدرات، ولما اشتكيت لاهله بيقفوا معاه ويقولوا راجل براحته يعمل اللي عايزة، ابوه بس اللي كان بيقف معايا، لما لقيت ان خلاص مفيش فايدة معاه قررت اسيبه ومرجعلوش تاني.
دعوى نفقة
أنهت «مروة» حديثها وقالت: اتطلقت منه ودي بسبب الخيانة والمخدرات، اتطلقنا ودي وانا اللي دفعت حق المأذون، أصعب حاجة الخيانة كانت كل مادى بتزيد وانا مقدرتش اتحمل، مغلبني في النفقة ومبيدفعش جنية، سنة انا والتلت ولاد عند امي ومبيصرفش علينا جنية فرفعت قضية نفقة.
تابع أحدث الأخبار عبر
