"مبهدل بنتي ضرب".. أم سمية في المحكمة "مشغلها بقاله 20 سنة عشان تستته "
تواجدت «أم سمية» اليوم في محكمة الأسرة مع ابنتها لتقدم لها العون وتكون لها سند في هذه الدنيا، وكانت هي قلبها يحترق على الحال الذي وصلت له ابنتها بعد سنين العذاب التي عاشتها مع زوجها الذي لم يقدرها أو يصونها مثل ما أملت «أم سمية».
كان سبب تواجد «أم سمية» وابنتها في محكمة الأسرة انه لمدة 20 عام عاشت الزوجة في ألم مع زوجها الذي لم يصرف عليها أو على أبنائهم، وكان يطمع ان تعمل الزوجة وتصرف عليه وعلى بيته وتأخذ هي دوره، وبالرغم من موافقة الزوجة على أخذ هذا الدور بدلا من الزوج، لم تجد من زوجها أي تقدير ولكنها وجدت ضرب واهانة من الزوج ومعاملة قاسية، وجعلها تلجأ في النهاية لمحكمة الأسرة لتعوض السنين التي ضيعتها مع زوجها.
مش مرتحاله من ساعة ما دخل بيتنا
قالت «أم سمية»: بنتي بقالها 20 سنة متجوزة ومتحملة جوزها، من ساعة ما دخل بيتنا وانا مكنتش مرتحالة، وبعد الجواز اكتشفنا ان هي متعلمه وهو معاه اعداديه و مقالناش، خلفت منه 3 عيال وطول السنين دي عايشة ومتحملة عشانهم.
تابعت الأم: بنتي كانت بتجيب حجات وتبيعها عشان تعرف تصرف على بيتها وعلى ولادها، لأنها من ساعة ما اتجوزته وهو مبيصرفش، كان اخره يسيب 10 جنية وانا اللي كنت بجيب الأكل للعيال، وعاشت طول السنين دي على أمل انه يتعدل ويبقى أحسن، لما كانت بتقوله عايزة مصاريف بيقولها انا كدة ده اللي عندي ان كان عاجبك.
سايب بنتي تشتغل عشان تصرف على العيال
أضافت «أم سمية»: لحد ما بنتي كبرت وبقت معروفة في السوق، وهو برضو مش عايز يصرف على العيال، وفوق اللي هي متحملاه بقى ضرب واهانة، بيضربها ضرب جامد وكسرلها صباعها في مرة، لحد أخر مشكلة قالتله انت مش معايا في أي مصاريف ورامي المسئولية عليا، مسكها ضربها خلاها تجيب دم من كل حته.
اخره 50 جنية
أكملت «أم سمية»: خدت عيالها معاها ومشيت وهي اللي بتصرف عليهم دلوقتي زي كل السنين دي، هو مش بيسأل فيهم لو بعت حاجة ليهم 50 جنية اخره، وهو معاه فلوس بس بيبخل عليهم، ابنها الكبير مش عايز يعرفه تاني، لانه في اخر مشكلة وقف لأبوه عشان اللي بيعمله في امه وساعتها ضرب الولد ومن ساعتها وهو مش قادر ينسى اللي عمله معاه، ودلوقتي رفعت عليه قضية خلع.
تابع أحدث الأخبار عبر
