سلمى في محكمة الأسرة: مرات جوزي الأولى سرقت شقا عمره وعايزة تحبسه
زواج انتهى بسبب خلاف، وبعد انتهائه دفع كل من الزوج والزوجة والطفلة ثمن هذا الخلاف، ولكن معهم أيضا تدفع الزوجة الثانية الثمن في زواج لم يكن لها أي دخل به أو بانتهائه، وتتواجد في محكمة الأسرة من أجل زوجها.
"مرات جوزي الأولى سرقت شقى عمره، وعايزة تحبسه".. هذا ما بدأت به «سلمى» حديثها عن سبب تواجدها في محكمة الأسرة، وهو بسبب قضايا رفعتها الزوجة الأولى لزوج «سلمى» الذي تزوجته زواج صالونات، وكانت تأمل في أن تتزوج وتستقر حياتها في بيتها، ولكن ما حدث أنها تتواجد في المحاكم تقدم دورها كزوجة أصيلة تقف بجانب زوجها، وتقدم له الدعم.
«سلمى»: رفعت دعوى طلاق ضرر وجوزها أصلا مسافر
قالت «سلمى»: ـنا اتجوزت من سنة جواز صالونات، وجوزي كان متجوز قبلي واحدة، وكان بقالهم 10 سنين متجوزين ومخلفين بنت، من فترة حصلت مشكلة بين زوجته الأولى وإخواته، ولما حصلت المشكلة سابت البيت، وخدت كل حاجة معاها وهي ماشية، مسابتش أي حاجة، وبعدين رفعت عليه دعوى طلاق ضرر، بس لحد دلوقتي متحكملهاش بالطلاق؛ لأنه مسافر من ساعة ما اتجوزوا وبيشتغل برة، ومفيش ضرر حصل لها، ولما رجع وحاول يصالحها ويرجعها هي رفضت، واتقدم لي واتجوزنا.
«سلمى»: مراته سرقت شقا 17 سنة
وتابعت «سلمى»: لما مراته سابت البيت خدت كل فلوسه وشقا 17 سنة، ودلوقتي رافعة عليه دعوى نفقة وليها نفقة متجمدة 100 ألف جنيه، هي مش عايزة غير تخرب بيته وتحبسه. جوزي مسافر برة مصر يشتغل وانا اللي باتابع القضايا اللي هي رافعاها.
«سلمى»: جوزها كان كويس معاها وهي عايزة تحبسه
وأكملت الزوجة كلامها، وقالت: هي عندها حق، أهله فعلا ناس صعبة، بس هو مكنش وحش، وكان بيعاملها كويس، حياتهم كانت عادية ومكنش فيه بينهم مشاكل، طالما جوزك كويس إزاي تسرقيه وتاخدي كل فلوسه وتكوني عايزة تحبسيه؟! أنا مبتعاملش مع أهل جوزي كتير عشان ميحصلش معاهم مشاكل، جوزي مش راضي يدفع النفقة لأنها سرقته وخدت منه كل حاجة، مستني حكم الطلاق عشان يدفع، ودلوقتي رافعة عليه دعوى زيادة نفقة، ومش مخلياه يشوف بنته، وأنا اللي بالف في المحاكم عشان اتابع القضايا اللي رفعتها عليه.
تابع أحدث الأخبار عبر
