«آكل أموال اليتامى».. صفاء في دعوى خلع: جوزي التاني بيسرق فلوس ولادي
تزوجت «صفاء» أول مرة من 14 سنة وكانت الحياة طبيعية بينها وبين زوجها الأول وأنجبت منه ولد وبنت، وكانت تحمد الله عليهم كل يوم، ولكن وفي يوم تفاجئت «صفاء» بوفاة زوجها وتركها لها ولأولادها.
صفاء في دعوى خلع: جوزي التاني بيسرق فلوس ولادي
حاولت «صفاء» أن تجد الأمل مرة أخرى في حياتها بزواجها مرة أخرى لكن بعد زواجها تفاجئت بطباع زوجها الصعبة وبخله عليها، فكان لا يصرف عليها أو على ابنتها منه، وحتى كان يريد أن يأخذ أموال أولادها اليتامى الذي يرسلها لهم أعماهم، ولجأت «صفاء» لمحكمة الأسرة لترفع دعوى خلع وتتخلص من زوجها وظلمه.
جوزي اتوفي وسابني أنا وولاده
قالت «صفاء»: اتجوزت أول مرة من 14 سنة، معايا منه بنت 14 سنة وولد 11 سنة، اتعرفنا على بعض لأننا كنا جيران، والحياة بينا كانت طبيعية، والمشاكل زي أي زوجين، وفجأة اتوفى في حادثة عربية، وسابني أنا وولاده ومكنش في حد معانا.
جوزي التاني عايزني أصرف عليه
تابعت «صفاء»: بعد وفاه جوزي عيشت عشان أربي ولادي، وكنت ليهم أم وأب، واتعرفت على واحد معايا في الشغل، وعدني أنه هيسعدني وياخد باله من ولادي اليتامى، اتجوزته ومن ساعة الجواز بقى عايزني أنا اللي اشتغل وأصرف، وهو مفيش مصاريف يشتغل ويجيب بفلوسه سجاير.
عايز ياخد فلوس ولادي اليتامى
أضافت «صفاء»: ولادي من جوزي الأول كانوا عايشين معايا، أعمام ولادي اللي أبوهم متوفي بيدفعوا نفقة عشان لو احتاجوا حاجة وجوزي كان عايز ياخدها منهم، بيقول مش من حق عيالك ياخدوها، حتى بنته اللي خلفتها منه مبيصرفش عليها وأنا اللي بشتغل وأصرف.
سيبته لما لقيته هيدمرني أنا وولادي
أكملت «صفاء» كلامها وقالت: آخر مشكلة حصلت بينا كانت بسبب إنه مجبش لحمة للبيت في العيد، ومسك ابني وضربه، ونكد على العيال ومش عايزهم يخرجوا ولا يتفسحوا ساعتها قررت أسيبه، لقيت نفسي أنا هتدمر وعيالي نفسيتهم بقت زفت، ومرضيتش أرجعله تاني من وقتها.
وجوده زي عدمه
أنهت «صفاء» حديثها وقالت: سيبته ورفعت عليه دعوى خلع عشان أخلص منه هو كدة كدة وجوده زي عدمه، ومكنش بيصرف عليا وأنا عايشة معاه، وكان عايز أبويا هو اللي يصرف عليا، ويجيب لبس وأكل ليا أنا وعيالي، فرفعت عليه قضية نفقة عشان بنته اللي راميها ومش بيسأل فيها.
تابع أحدث الأخبار عبر
