«مليش حظ في الرجالة».. سميحة: جوزي الأول خاني والتاني عذب ولادي
تزوجت «سميحة» في أول حياتها وبعد حدوث خلافات عديدة بينها وبين زوجها، تطلقت منه وبعد سنين عديدة وزواج أخر، أعادت «سميحة» نفس الغلطة وعادت لنفس الزوج مرة أخرى.
تواجدت «سميحة» على أعتاب محكمة الأسرة اليوم وهي تحمل أسى وحزن على فشل زواجين، واجهت «سميحة» في حياتها العديد من المشاكل عندما تزوجت أول مرة وتطلقت وعندما تزوجت المرة الثانية وتطلقت وعادت لزوجها الأول مرة أخرى، ولكن ما جعلها تلجأ لمحكمة الأسرة هو عندما وجدت أن أطفالها يتعرضوا لأذى وأصبح هدفها أن تنقذهم وتعطيهم مستقبل أفضل.
اقرأ أيضا
سيبت جوزي الأول بسبب بهدلتي معاه
قالت «سميحة»: اتجوزت واحد قريبي أول مرة ومخلفتش منه، وسيبته بعد 3 سنين بسبب أن حصل بينا مشاكل كتير من ساعة ما اتجوزنا، كان بهدلة وضرب وإهانة من ساعة ما اتجوزته، ولما مقدرتش اتحمل طلبت الطلاق ومكملتش معاه وطلقني بعد مشاكل كتير.
جوزي الثاني ميعرفش ربنا وبيخوني
تابعت «سميحة»: اتجوزت تاني وفضلت مع جوزي التاني 8 سنين، وخلفت منه بنتين وولد، جوزي التاني كان ميعرفش ربنا ومعاملته معايا مش أحسن حاجة بس اتحملت عشان ولادي، عرف عليا واحدة ساكنة في الشارع اللي احنا فيه بقى يصرف عليها ويكلمها ومش عامل حساب ليا، لحد ما تعبت منه ومقدرتش اني اكمل معاه مش عشان خيانته والست اللي عرفها عليا بس عشان عمايله معايا، وفي الأخر اتطلقت منه.
اقرأ أيضا
عذب ولادي وأنا في الشغل
أضافت «سميحة»: رجعت لجوزي الأول تاني لما اتطلقت من التاني، الأهالي اتدخلوا وقالولي ده اتغير ومبقاش زي الأول بس لما رجعتله لقيته نفس الطبع وما اتغيرش بيضرب وبيشتم زي الأول، لما رجعتله ولادي كانوا عايشين معايا بقى يستنى انزل الشغل الاقيه ماسك ابني ضربه وحرقه في جسمه.
قدامي بيعامل العيال كويس ومن ورايا بيعذبهم
أنهت «سميحة» كلامها عن قصتها وقالت: أبو ولادي مبيصرفش عليا أولاده المفروض بيديني فلوس كل شهر لكنه شهر يديني وشهر لا، عشان كدة كنت بضطر إني أنزل واشتغل والتاني كان بيستغل الفرصة ويعذب ولادي ويجي قدامي يعامل العيال كويس، سيبت البيت وخدت ولادي عشان ألحقهم من اللي بيحصلهم، ورفعت عليه قضية خلع عشان أخلص منه لأنه المرة دي مش راضي يطلق.
تابع أحدث الأخبار عبر
