أمنية للقاضي: أبويا ساب عمي يتهجم على أمي واخواتي البنات بالسكينة
دعوى نفقة في محكمة الأسرة.. هذا ما وصل له ثلاث بنات في بداية العشرين والسبب هو والدهن الذي من المفترض أن يحميهن ويوفر لهن المحبة والعطاء لكن والدهن الذي سكنت قلبه القسوة لم يترك لبناته أي حل غير اللجوء للمحاكم أمام أبيهن.
عشرة عمر وزواج دام لمدة 30 عاما كان بهم لحظات سعيدة ولحظات أليمة لكن كانت حياة طبيعية فزوج والد «أمنية» ووالدتها الابنتين الكبار وأصبحا جدين بعد كل هذه السنين تطلق الزوجين وطرد الأب ابنتيه، قدمت «أمنية» لأخواتها الدعم عند رفعهن قضية أمام أبيهن لأنها شهدت أفعال أبيها الذي أدت لهذا القرار من طرده لهن في ثالث يوم رمضان، تركه لعمهن يتهجم عليهن، ورفضه أن يصرف عليهن أي أموال.
«أمنية»: أبويا بيتهم أمي في جوز أختي الكبيرة
قالت «أمنية» عن مشكلة والدها مع والدتها وأسباب طلاقهما: أبويا وأمي كانوا ناس عاديين والمشاكل بينهم كانت عادية لكن المشاكل زادت من أربع سنين بعد ما أبويا حصله بتر في رجليه ساعتها محدش وقف معاه غير مراته وبناته لكن اخواته وأولادهم محدش وقف معاه، أمي استحملت معاه كتير لكن حجات كتير خلتها تتعب وتطلق زي الشك، كان بيشك فيها طول الوقت لو اتكلمت مع المدير أو جوز بنتها وبيغير عليها حتى من حفيدها اللي عنده ست شهور عشان بتحضنه وتشيله وكان دايما يتهمها في جوز اختي الكبيرة، واستحملت تدخل أهله ومشاكلهم الكتيرة لكن اللي أبويا عمله مع اخواتي البنات هو اللي خلاها تسيبه و مقدرتش تكمل معاه وتقرر انها مش عايزة حاجة غير أنها تلحق بناتها.
أكملت «أمنية» كلامها والدموع في عينيها فمن الصعب على أي شخص أن يكون في موقفها فهي ترى والدها وأخواتها أمام بعضهم في محكمة الأسرة وقالت: احنا أربع بنات الاتنين الكبار متجوزين والاتنين الصغيرين 22 و 23 سنة و أبويا كان بقاله 4 سنين مبيصرفش خالص والاتنين الصغيرين كانو بيشتغلو ويصرفو بس بسببإن الشغل كان بعيد عن البيت سابو الشغل وكانو بيدورو على شغل تاني لما حصلت مشكلتهم مع بابا، المشكلة كانت بسبب ولاد عمي الصبيان وأخويا، لكن عمي ومراته دخلو اخواتي فيها واتهجمو عليهم في البيت وبابا وقف معاهم وطرد اخواتي، طردهم من البيت من تالت يوم رمضان من غير أي فلوس.
«أمنية»: عمي اتهجم على أمي وأخواتي بالسكينة
تابعت أمنية: في يوم المشكلة عمي اتهجم على أمي واخواتي بالسكينة، اخواتي كلموني عشان الحقهم لأنهم كلموا بابا قالهم هاجي ومجاش وقالولي اطلبي البوليس لو رنينا عليكي تاني كنت خايفة عليهم ومكنتش أتوقع من أهلي انهم يعملوا كده في لحمهم.
أضافت أمنية في آخر حديثها: ماما اتطلقت من 4 شهور عشان تطلق منه اتنازلت عن القائمة والمؤخر وعن كل حقوقها عشان تنقذ اخواتي ولما أخواتي طلبوا من بابا فلوس قالهم ملكوش عندي حاجة الي تطلوه بالمحكمة خدوه ولما حاولو يدورو على شغل احتاجو ورقهم من البيت اللي طردهم منه قالهم عاوزين ورقكوا أمكم تتنازل عن نص الشقة يا إما هبيع النص التاني لمرات عمكم وهي هتعرف إزاي تطفشكم.
تابع أحدث الأخبار عبر
