يارا: "جوزي رفع قضية عشان مش عايز يصرف على ابنه. وابني فاكر أبوه ميت
قصة «يارا» مثل العديد من السيدات اللاتي يلجأن لمحكمة الأسرة عند يأسهن من أزواجهن الذين لا يتحملون مسئولية زوجة أو بيت أو أطفال، ولكن المختلف في قصتها أن زوجها لم يكفه المأساة التي عاشتها معه وعدم تحمله للمسئولية في زواجهم، بل رفض تحمل المسؤولية بعد طلاقها أيضا، وجعلها تلجأ لمحكمة الأسرة لتحصل على حقوقها.
منذ زواج «يارا» وظهر وجه زوجها الحقيقي الذي كان يخبئه طول فترة خطوبتهم، ومع الوقت ازداد الزوج في القسوة والكره اتجاهها هي وطفلهما، حتى وصل الأمر في النهاية أن ابنهم يظن أن والده متوفى بسبب العلاقة المعدمة بينهم.
«يارا»: كان ملاك قبل الجواز
قالت «يارا»: اتطلقت من 3 سنين ودي عند مأذون، في فترة الخطوبة كان ملاك وميبانش عليه أي حاجة، لكن بعد كده اتغير، وبقى بني آدم تاني، المشاكل كانت من بعد الخلفة إنه مبيصرفش، ولما اطلب منه يقول لي مفيش، وده اللي معايا، وكان أهلي وأبويا بيساعدوني عشان أعرف أعيش، لكن جوزي عمره ما قدر مساعدة أبويا لينا.
«يارا»: كان ابن امه وبيعرف ستات عليا من الشغل
تابعت الزوجة: المشاكل مع الوقت كانت بتكتر وهو كان ابن امه لو فيه مشكلة تتحل بينا إحنا الاتنين يروح يحكي لها ويرجع متغير وكلامه متغير ومش طايقني، كان يعرف ستات عليا من الشغل، كنت بعرف من الموبايل، كل ده أنا عديته واستحملته، لكن اللي عمله معايا من بعد موت أبويا هو اللي ما قدرتش استحمله.
«يارا»: جوزي استقوى عليا بعد وفاة أبويا
تابعت «يارا» والدموع في عينيها: بعد وفاة والدي بدل ما يقف جنبي ويبقى معايا في الفترة الصعبة دي ويقدر كل اللي أبويا عمله معاه، هو عمل العكس استقوى عليا أكتر وبقى يضربني كمان وافتكر إنه مفيش حد يقف معايا، سبب الطلاق إني اكتشفت إن فيه معاه فلوس كتير بس مبيصرفش علينا، ولما واجهته قال لي شايلهم. أمال هصرفهم عليكي يعني؟!
«يارا»: ابني فاكر خطيبي أبوه
وأضافت «يارا»: سبته واتطلقت، ومن يوم الطلاق مشافش ابنه، ابني كان فاكر إن أبويا اللي اتوفى هو اللي أبوه من كتر ما أبوه مكنش حنين معاه، ولما اتخطبت دلوقتي فاكر إن خطيبي هو أبوه، بعد ما اتطلقت رفعت عليه دعوى نفقة، وبعد ما كسبتها رفع قضية إنه مش هيصرف على ابنه، وبيقول معهوش فلوس، بس هو معاه ومش راضي يصرف عليه.
تابع أحدث الأخبار عبر
