«الشقة بنياها بفلوسي».. سحر في دعوى طلاق: "اكتشفت خيانته بعد 25 سنة جواز"
دفعت «سحر» ثمن وقوعها في الحب من عمرها 28 سنة اضاعتهم مع زوج لم يفكر سوى في نفسه ولم يرحمها هي ولا بناتهم او يقدر أي من تضحياتها وجعلها تلجأ لمحكمة الأسرة لتنهي حياتها معه.
تزوجت «سحر» في سن صغير وكانت تحب زوجها وزوجها يحبها وعاشوا حياة طبيعية وأنجبوا 3بنات سويا وكانت الحياة مستمرة حتى تغير زوجها واستمر في خداعها حتى تحول لشخص لاتعرفه وتحول كل الحب في قلبها له لكره.
قالت «سحر»: “كنا بنحب بعض جدًا عشت معاه 28 سنة في أول الجواز الدنيا كانت كويسة ومكنش في مشاكل غير العادية، بعد 10 سنين تقريبا زعلنا مع بعض بسبب مشكلة تافهة وبعدنا عن بعض فترة سابلي البيت أنا والعيال ومعرفتش هو فين وفرحت لما رجعنا لبعض، اكتشتفت بالصدفة إنه كان مطلقني لما خدني عند دار الأفتاء بحجة إنه عايز يستفسر عن حاجة حرام ولا حلال واتفاجئت بيه بيقول للشيخ أنا كنت رامي عليها يمين قبل كدة والشيخ قاله أنت كدة طلقتها قدام ربنا لأن كان في نيتك طلاق وتحرم عليك، اتصدمت ساعتها لكن رجعتله كنت بحبه ومش عايزة اخرب بيتي”.
«سحر»: ربيت ولادي لوحدي محدش وقف معايا
تابعت «سحر»: “كان مسافر وبيشتغل وسايبلي العيال صغيرين 3 بنات أنا اللي بربيهم لوحدي الكبيرة كان سايبها عندها 4 سنين دلوقتي هتخلص جامعة أنا اللي ربيت ووقفت وهو غايب وطلبت منه يرجع ويعيش وسطنا عشان نعمل حاجة لعيالنا ووافق”.
حكت «سحر» عن خداع زوجها المستمر لها وقالت: “كان عنده بيت قلتله نبني شقة احنا عندنا بنات ولازم نسيبلهم حاجة قالي معيش فلوس قلت خلاص أنا هعمل قرض من شغلي وهبني أنا واتفقنا إنه هيكتبلي نص الشقة حقي، كنت بقف في عز المطرة وعز الحر عشان ابني الشقة تكون لينا ونعيش فيها كنت لوحدي مليش اب ولاعم ولاحد يقف جنبي، وبعد ما بنيت وعملتلنا بيت قالي أخواتي بيقولوا مينفعش اكتب لمراتي في بيت أبويا وضحك عليا تاني بعد ما حفظت بيته وصنته طول السنين دي وسكت ساعتا قلت أهو البيت في الآخر هيروح لعيالي”.
«سحر»:اكتشفت بعد 25 سنة جواز إنه بيخوني
تحملت «سحر» زوجها على أمل ان يعود الرجل الذي وقعت في حبه لكنه فعل لم تتوقعه تابعت: سيبته لما عرفت إنه خاني، بناتي اللي اكتشفوا شافوا حجات على تليفونه ومرديوش يقولولي عشان مطلبش الطلاق بس معاملتهم معاه اتغيرت وبقوا يعاملوه وحش وأنا بناتي مربياهم وعارفة انهم محترمين، عاتبتهم انهم ازاي يعاملوا ابوهم كدة بنتي الكبيرة انفجرت فيا وقالتلي هتفضلي مغفلة لحد امتى مفهمتش قصدها ايه لحد ما حكتلي شافت ايه ولما واجهته ما أنكرش ومرجعش عن اللي هو فيه وبالرغم كل ده مطلبتش الطلاق عشان مخربش البيت لكن مفيش فايدة عاه.
أنهت «سحر» كلامها وقالت: “ساب البيت بقاله سنتين وقاعد في الشقة اللي أنا بنيتها بفلوسي وعايز يتجوز فيها ومبيصرفش علينا طبعا، أول مرة بعد 28 سنة ضربني عشان كنت بحاول أصالحه وارجعه لينا تاني ساعتها طلبت الطلاق مش راضي يطلقني غير لما اتنازل عن كل حقوقي وقلتله هطلق واخد حقي منك ورفعت عليه دعوى طلاق لاني كرهته ومش عايزة اكمل معاه”.
تابع أحدث الأخبار عبر
