«حظها في الجواز أسود».. أم نهاد لـ الحادثة: بنتي عاشت 11 سنة جحيم وأنا قولتلها تستحمل
في بداية حياتها تزوجت «أم نهاد» وأنجبت ابنتها الكبرى «نهاد» ولكن بعد زواجها اكتشفت أفعال زوجها التي لا تحتمل، قررت أن تنقذ نفسها وابنتها وتترك زوجها، ولكن لم تعلم أن الحظ السيئ سيلاحق ابنتها وستعيش ابنتها نفس قصتها، وتصل في النهاية لـمحكمة الأسرة لتجد حل لمشكلاتها.
تزوجت «نهاد» وهي في سن الـ 21 وعند زواجها لم يحذرها الناس من أخلاق العريس أو أهله فانخدعت فيه هي وأهلها ووافقوا على الزواج، ولكن منذ زواجها وبدأت المشاكل والإهانات من زوجها وعائلته، «أم نهاد» حاولت أن تحافظ على بيت ابنتها حتى لا تمر بتجربة مماثلة لتجربتها، عندما تطلقت من ابيها وتحملت مسئولية تربية أولادها بالكامل وحدها، لكن ما مرت به ابنتها كان لا يحتمل وعندما وجعها قلبها على حال ابنتها وما وصلت له تدخلت لإنقاذها هي وأطفالها، وهي الآن تطرق أبواب محكمة الأسرة ومعها ابنتها وأحفادها وتأمل أن تجد حل وتعطى ابنتها أمل في الحياة.
اقرأ أيضا
بنتي عاشت 11 سنة في عذاب
قالت «أم نهاد»: “بنتي اتجوزت 11 سنة شافت فيهم بهدلة وشتيمة واهانة وزوج مبيصرفش ومش بيتحمل المسئولية، اتقدملها هي لسه صغيرة، كنا نعرفه من أخويا اتجوز من عليتهم على مراته وسابها هي وعياله، كان المفروض منتجوزش من عيلتهم لما ده حصل لكن جوز بنتي لف عليها واقنعها تتجوزه، وأنا وافقت عشان خاطر بنتي ومكسرش فرحتها، المشاكل بدأت من يوم ما اتجوزها، وأنا اللي كنت بقولها تعيش وتستحمل عشان بيتها ميتخربش وعيالها يتبهدلوا”.
جوز بنتي كان بخيل ومبيصرفش عليها
تابعت «أم نهاد»: “جوزها كان مبهدلها ومبيصرفش عليها ولا على عيالها وكل فلوسه مضيعها على أهله، وطول الوقت قاعد عند اهله، كنت بساعدها وأديها فلوس وأجيبلها أكل وشرب وحجات لبيتها عشان متحسش أن في حاجة ناقصاها، وياريت جوزها كان عاجبه أو بيشكر، كان ممكن أخليها تكمل معاه لو هو ظروفه وحشة بس هو كان معاه بس بخيل على بنتي وعيالها وفوق كل ده مبهدلها في عيشتها ومش مريحها”.
اقرأ أيضا
مبهدل بنتي وحياتها معاه كلها ضرب واهانة
أكملت «أم نهاد» وهي حزينة على الحال الذي وصلت له ابنتها: “أهله كانوا نفس أخلاقه لما كنا نكلمهم مكنش حد بيقدر عليه أو يحاول ينصحه، في العيد الصغير بدل ما يفرح بنتي مسكها وضربها وشتمها شتايم تعيب فيها وفي أهلها، كلمتني وهي بتعيط صعبت عليها نفسها وقلبي اتحرق على بنتي قلتلها هاتي عيالك وتعالي وقررت أنه كفاية كدة مش هخليها ترجعله تاني”.
«أم نهاد»: البنت وامها حظهم اسود في الجواز
مع الكلام مع «أم نهاد» بدأت أن تكشف عن قصتها ومعانتها الشخصية التي مرت بها وكشفت مفاجأة أنها مرت بمثل ما حدث مع ابنتها في زواجها وقالت: “البنت وامها حظهم اسود في الجواز، أنا اتجوزت أبو بنتي دي كان مبيصرفش علينا ويسبنا ولوحدنا ياخد المفتاح ويمشي، بقالي 27 سنة متطلقة منه، من ساعتها مبيرفعش السماعة عليها ولا بيصرف عليها جنية واحد لما كانت تكلمه ويعرف أن هي اللي بتتكلم يقفل السكة في وشها على طول، أنا كان حظي أحسن من حظ بنتي لأن أهل جوزي وقفوا معايا وطلقوني منه، عيالي ربتهم وكبرتهم وجوزتهم”.
اقرأ أيضا
«أم نهاد»: أبو بنتي مكنش بيسال فيها وجوزها مبيسالش في عيالها
أنهت «أم نهاد» كلامها وقالت: “أنا اللي وقفت مع بنتي ومسيبتهاش لوحدها في الدنيا ودلوقتي معاها في محكمة الأسرة ورافعة دعوى خلع عشان تخلص من جوزها، وبعدين هفضل معاها لحد ما ترفع دعوى نفقة عشان عيالها التلاتة لأن جوزها مبيصرفش عليهم ولا بيشوفهم من ساعة ما سابت البيت، وهفضل معاها لحد ما تلاقي مكان تعيش فيه هي وعيالها ويبقى معاها معاش تعيش منه واتطمن عليها أنها مرتاحة ومبسوطة في حياتها”.
تابع أحدث الأخبار عبر
