بنته مرعوبة منه وجاب لها تبول لا إرادي.. وداد للقاضي: لو رجعتله هيرجعني في صندوق
زواج الأقارب فخ يقع فيه البعض، يعتقد بعض البنت أن زواج قريب سوف يكون حماية لها فهي تعرف أهله وتربيته وتاريخه فهو خيار مضمون لكن مثل نجاح بعض الأمثلة هناك العديد من الأمثلة التي تفشل وتترك أثر لا يمكن نسيانه مع مرور الزمن.
تزوجت «وداد» من ابن خالتها في سن صغير عندما تقدم لخطبتها وكانت تأمن له ولا تدرك أنه في يوم من الأيام سوف يجعلها تكره حياتها وتتمنى أن ينتهي هذا العذاب وجعلها تلجأ في النهاية لمحكمة الأسرة لتستطيع أخذ حقوقها منه وحقوق أولادها الذي دمرهم بقسوته عليهم.
«وداد»: حاولت أطلق من جوزي كتير لكن أهلي منعوني خوفا من الناس
قالت «وداد» وهي تحمل الابتسامة على وجهها بالرغم من العذاب الذي رأته مع زوجها: اتجوزت ابن خالتي 14 سنة، خلفت بنتين، فضلنا أول 5 سنين جواز من غير خلفة، من أول الجواز في مشاكل وحاولت أطلق منه كذا مرة لكن كل مرة أهلي يقولولي لا مينفعش وكلام الناس.
تحدثت «وداد» عن مشكلتها مع زوجها وقالت: المشاكل كانت على كل حاجة الشك والغيرة كان عايز يتحكم في كل حاجة بيتلكك عشان يعمل أي مشكلة طول الوقت، عايزني أقطع علاقتي بأهلي وبأهله وميبقاش لي أي حد ولا لي علاقة بأي حد، ولما أشتكي لأمه اللي هي خالتي كانت بتقولي استحمله وبكرة يتعدل.
«وداد»:بيضرب ضرب ميسبش أثر عشان ميبقاش في دليل
أضافت «وداد»: بعد خلفة أول بنت ربنا كرمني ببنت تانية وعشت عشانهم وعشان أربيهم، استحملت ضرب وشتيمة وإهانة بسبب ومن غير سبب كان بيقولي أنا بضربك ضرب يوجعك بس ميسبش أثر عشان متعرفيش تمسكي عليا حاجة ولا تعرفي تروحي تشتكي في القسم ده مكنش بني آدم أحس معاه بالأمان.
«وداد»: طردني من غير طرحة ومن غير جزمة بره البيت
تابعت الزوجة كلامها وقالت: كل بني آدم ليه طاقة وتحمل وطاقة صبر والطاقة دي ليها أخر وأنا تعبت وجبت أخري منه، كنت بغضب كتير ويرجعني يقولي هتحسن وفي الأخر ملاقيش حاجة اتغيرت وحاله بيتغير للأسوء أخر مشكلة حصلت بينا مش فاكرة حتى سبب المشكلة ضربني وشتمني وأخد من العيال وطردني من غير طرحة ومن غير جذمة بره البيت استلفت أجرة السكة من ناس في الشارع ومشيت ومرجعتش تاني بعد يومين جابلي ولادي وسابهملي، بعد 3 شهور كلمني وقالي أرجعي وهعملك اللي أنت عايزاه قلتله أنا مبقتش عايزة أعيش معاك خلاص مبقتش مستحملاك.
تابعت وداد كلامها: بعد كل ده امي قالتلي يبنتي ارجعي وعيشي ومتخربيش بيتك قلت لها أنا لو رجعتله هرجع في صندوق وانت اللي هتعيشي بذنبي ده بني آدم دمرني أنا وعيالي، بنتي الكبيرة عندها تبول لا إرادي بسبب خوفها منه وصوته العالي ولفيت بيها عند الدكاترة عشان تتعالج وتنسى اللي عمله فينا.
وأنهت الزوجة: مرضيش يطلقني ودي قال عايزة تطلق ودي تجيب العيال وتتنازل عن كل حاجة تخضها قلت أنا مش عايزة منه حاجة أنا بس عايزة أعيش لولادي ورفعت عليه خلع عشان أخلص منه ودلوقتي رافعة عليه دعوى نفقة.
تابع أحدث الأخبار عبر
