ركبني المرض.. نادية للقاضي: رفع علي السكينة عشان يطردني أنا والعيال من البيت
تزوجت «نادية» سريعا في سن صغير، ولم تعرف أن هذا الزواج الذي سيستمر 20 عاما سيتركها مريضة ووحيدة على أبواب محكم الأسرة وسيكون القرار الذي ارتكبته سريعا تحت ضغط أهلها سيدمر حياتها ومستقبلها.
تزوجت «نادية» في 1998 بعد خطبة دامت 3 أسابيع فقط كان عريس جاهز وتحت ضغط أهلها وافقت، خطبت في رمضان وعلى العيد تزوجت ولا يسع نادية سوى التفكير إذا قضت في الحطوبة وقت أطول هل كان سيتغير قرارها ولا تتزوج الشخص الذي كذب عليها وخدعها لمدة 20 سنة.
نادية: في أول سنة جواز غير الكالون وطردني أنا وابني.
أضافت الزوجة: المشاكل معاه كانت من أول سنة حصلت مشكلة وضربني وكانت أول مرة، ساعتها سيبت البيت ورحت عند أهلي وكنت لسه مخلفة ابني، غير الكالون وسابني عند أهلي ومكنش راضي يديني حاجتي أنا وابني، رفعت نفقة وتمكين بعد أول سنة جواز لما عرف إني رفعت عليه قواضي جه واتحايل علي إنه هيتغير وهيبقى أحسن وقالي اسامحه واتنازل عن القواضي ومقلش لأهلي ولا للمحامي أني هتنازل سمعت كلامه اتاريني مغفلة ومش عارفة هو ناوي على إيه.
خداع زوج نادية لها لمدة 20 سنة
تحدثت «نادية» عن خداع زوجها لها وقالت: أنا كنت رافعة قضية بالقايمة ولما اتنازلت عن القضية مبقاليش قايمة ولا أي حقوق مكنتش أعرف الكلام ده لكن هو كان يعرف وكذب علي ومقاليش وأنا كنت مدياله الأمان وبعد 20 سنة لما طلبت منه الطلاق قلتله أنا هسيبك وأخد حقي منك ضحك في وشي وقالي ملكيش حاجة انتي اتنازلتي عن القايمة من 20 سنة وملكيش حاجة عندي.
نادية: جوزي كان بيحكم علينا مناخدش علاج
لمدة 20 سنة تحملت نادية حياة زوجية صعبة لم تشعر فيها بالأمان أو السعادة من أجل أولادها وتحملت إهانة وضرب وخلافات كثيرة تحكمات زوجها التي وصلت أنه لا يشتري لها ولا لأولادها العلاج عندما يحتاجوه ورغم كل ذلك لم تترك زوجها بل ظلت بجانبه على أمل أن تتحسن حياتهم.
تابعت نادية كلامها وقالت: مكنش في فلوس كفاية وحصل مشاكل كتير بسببها ولما اشتكيله يقولي ده اللي موجود عيشي بيه وكنت لما الدنيا تضيق علي باخد من أبويا ولما أبويا اتوفى مبقاش لي حد اشتكيله وبقيت أطلب منه وهو متعودش مني اني أطلب منه حاجة ودايما بتصرف فلما بقيت أطلب منه المشاكل زادت وبقت لاتحتمل ومن كتر المشاكل صحتي تعبت ودخلت المستشفى ساعتها قررت اسيبه واطلق لأني خلاص تعبت وولادي دلوقتي كبروا ومبقتش اخاف عليهم ...لما طلبت الطلاق بهدلني ووراني الويل عشان يطلقني.
أنهت نادية قصتها وقالت: بعد ما طلقني كسر الباب ورفع علي سكينة عشان أسيب البيت وأنا حاضنة قلتله دي شقتي أنا وعيالي لكني خفت منه استنيت نام ومشيت وسيبت البيت ومرجعتش تاني، وبعد فترة متحملش العيال وغير الكالون وقالهم روحوا لأمكم رفعت عليه دعوى نفقة عشان العيال بعد ما مشينا وسبناه أنا سبت حقي بس مش هسيب حقهم.
تابع أحدث الأخبار عبر
