«بيعني اللي ورايا واللي قدامي».. سماح لمحكمة الأسرة : «خد كل فلوسي وضيعها على البودرة»
عش زوجية جديد ظنت سماح أنه يكون بشرة خير لها هي وزوجها ولكن في الحقيقة أنه كان بشرة غير سارة بالمرة لهما بعد ما قرر الزوج أن يبتعد عن الاستقرار وتكون المخدرات هي ملاذه الوحيد دون مراعاة أي شيء أخر، ما أدي لنشوب الخلافات باستمرار بينهما ، ولكن رغم كل هذا الزوج مُصر على اختياره الذي دمر حياتهما.
لجأت سماح لمحكمة الأسرة من أجل رفع دعوى طلاق بعد ما انتهت كل السبل في محاولة إصلاحه وإبعاده عن المخدرات، مضيفة أنه عرف طريق الإدمان أثناء حملها في ابنهما الأول وأصبح السهر على المقاهي له الأولوية عن البقاء في المنزل، أضافت: "كان شغال صنايعي وكل الناس تحلف بحياته وإن أيده تتلفف حرير في شغله والكنب والحاجات اللي بيعملها وفضل كدا في أول كام شهر بس من الجواز".
تابعت سماح: "يدوب في الشهر الخامس من الجواز عرفت إني حامل وكنت بقعد أفكر إننا عايزين نحوشله فلوس عشان ندخله مدرسة كويسة ونصرف عليه كويس، بس للأسف في نفس الفترة لقيته متغير وأنا مش عارفة السبب".
بداية تغير الزوج
بدأت الزوجة تفكر في سبب تغير الزوج المفاجئ معها وأنه من المفترض أن يكون سعيد من أجل حملها في طفلهما الأول ولكنه كان غير الذي توقعته الزوجة وتفاجأت بأفعاله الغريبة، أضافت: “هو بطبيعته هادي جدًا وبيتفهم بس فجأة بقي عصبي ومش مستحمل مني كلمة، كنت بقول يمكن ضغط من الشغل بس لما لقيت الموضوع زاد قلت أكيد في حاجة، وفعلًا طلع في حاجة عشان عرفت إنه بيشرب مخدرات وبودة ومبقاش يرجع لي إلا نص الليل”.
أكملت سما حديثها: " أتكلمت معاه وحاولت أخليه يبطل ويبعد عن الطريق دا عشان ابننا اللي جاي في الطريق بس ولا كأني بتكلم، وبقا طول اليوم برا على القهوة، والشغل مبقاش ينزله خالص ومبقاش فيه فلوس في البيت غير فلوس شغلي" .
بياخد الفلوس اللي بشتغل بيها عشان يجيب النفس اللي بيشربه
سكنت الخلافات والمشكلات كل أركان المنزل بسبب إصرار الزوج على مشيه في هذا الطريق الذي جعله ينفق كل أمواله وأموال زوجته على إدمانه دون مراعاة للمولود الجديد، تابعت: "بقا ياخد كل فلوسي عشان يجيب القرف اللي بيشربه ولما أقوله في عيل جاي في السكة ولازم نحوش له يضربني ويأخذ الفلوس وينزل يجيب بيها مخدرات وفضلت على الحال دا حتى بعد ما خلفت العيل الأول والتاني وهو برضو شايل أيده من كل حاجة" .
انهت سماح قصتها: "سبت البيت كتير وكل مرة أهلي بيقول لي متبوظيش بيتك وارجعي، وبرجع كل مرة بس بقا قاعد لي في البيت وكل الفلوس اللي بجيبها عشان أصرف بيها على العيال بياخدها هو من الناحية التانية، مقدرتش أكمل كدا"، كان القضاء هو الحل الأخير لسماح عسى أن ينقذها من زوج يستنفذ كل طاقتها وأموالها من أجل الحصول على كيفه فقط دون مراعاة لأولاده ولجأت لرفع دعوى طلاق ولا تزال القضية منظورة في المحكمة حتى الآن .
تابع أحدث الأخبار عبر
