عزة في دعوى طلاق: اخواته البنات خربوا بيتي وبندم على حياتي معاه
تضرب المشكلات والخلافات بيوتا كثيرة مستقرة بمجرد تدخل الأهل بين الزوجين مثل "عزة" التي كانت تنعم بحياة سعيدة مع زوجها في عش الزوجية وفجأة تحول كل شيء بمجرد تدخل شقيقات الزوج في حياتهما جعلت الزوج يتغير في معاملته معها ما دفعها للجوء لـ محكمة الأسرة وترفع دعوى طلاق بعد ما فشلت كل محاولاتها في التأقلم معهم.
“اخوات جوزي هما اللي غيروه”.. بدأت عزة حديثها وهي تروي قصتها للقاضي، موضحة تغير زوجها في المعاملة بسبب كلام شقيقاته، أضافت: "من أول الجواز وهو كويس جدًا معاي وبيعاملني أحسن معاملة بس بقاله فترة متغير بسبب كلام اخواته عني، عشان كدا بقى حد تاني معايا خالص".
تابعت: "حصلت مشاكل كتير بيني وبين اخواته وكل مرة كنت بسيب البيت وأمشي بس كان بيرجعني تاني ويقعد يقول لي مش هخليهم يتدخلوا تاني بس كل ما أرجع ترجع الخناقات تاني وبتزيد كمان".
كل ما يروح عند اخواته يرجع وشه مقلوب
تحملت الزوجة معاملة شقيقات زوجها لها على أمل تحسين معاملتهم معها ولكن المعاملة تزداد سوءا مع مرور الوقت ووصل الأمر أنهم ينقلون أكاذيب عنها لزوجها ما أدى لنشوب الخلافات والمشكلات بينها وبين زوجها، تابعت عزة حديثها: "كنت بقول طالما المشكلة مع اخواته وهو كويس معايا مش مهم، بس بقى كل ما يروح عندهم يرجع وشه مقلوب مش طايق لي كلمة مع إنه قبل ما يروح بيبقى كويس معايا ومفيش أي مشاكل".
اخوات جوزي هما اللي خربوا البيت
أضافت: "اتكرر الموضوع كل مرة ومبقتش فاهمه إيه اللي بيحصل بس سلفتي قالت لي إنهم بيسخنوا جوزك عليكي وبيقعدوا يقولوا كلام عليكي محصلش، ولما كلمته وقلت له دا حصل ولا لا قال لي مفيش حاجة من الكلام دا حصلت".
أنهت الزوجة حديثها: "معاملته معاي بقت زي الزفت طول الوقت بسببهم، ومبقتش عارفة أعيش طول الوقت كدا في خناقات زهقت وهو كمان بقى واحد تاني خالص غير اللي أنا أعرفه، سبت البيت وطلبت منه يطلقني بس هو رفض عشان كدا رفعت قضية طلاق عشان أخلص منه ومن اخواته ومستنية الحكم".
تابع أحدث الأخبار عبر
