أخبار محكمة الأسرة
موريني الويل.. هند بـ محكمة الأسرة: أهل جوزي بيستنوا أخرج ويسرقوا البيت
تواجدت في محكمة الأسرة «هند» بسبب أهل زوجها الذي دمروا حياتها الزوجية بسبب تصرفاتهم الغير مقبولة والتي جعلت الحياة بينها وبين زوجها لا تحتمل ومن الصعب أن يكملوا سويًا، كان أهل الزوج يسرقوا عفشها ويستخدموه دون استئذان منها ولم يحترموا «هند» أو يحترموا خصوصياتها حتى اضطروها تتوجه لمحكمة الأسرة تبحث عن حقوقها.
قصص محكمة الأسرة.. اتجوزت في بيت عيلة عشان العادات والتقاليد
قالت «هند» في بداية حديثها: «أنا اتجوزت من 5 سنين، كان جواز تقليدي، لما جوزي اتقدملي وكنت عارفة اننا لما نتجوز هنعد في بيت العايلة عشان دي عادات وتقاليد في الأرياف الطبيعي كل واحدة بتتجوز في بيت أهل جوزها وافقت وعيشت معاه وكنت راضية، وخلفت منه بنت وولد والدنيا كانت ماشية في الأول».
دعاوي محكمة الأسرة.. أهله اتغيروا معايا
تابعت «هند» حديثها: «كنت عايشة في بيت عيلة من ساعة ما اتجوزت الحياة في الأول كانت ماشية أنا وجوزي مكنش في بينا مشاكل والدنيا كانت ماشية، لحد ما أهله طريقتهم بدأت تتغير معايا بس انا كنت بعدى عشان معملش مشكلة وحد يتضايق مني ولا أعمل مشكلة مع حد».
قضايا محكمة الأسرة.. أهل جوزي بيسرقوا بيتي
أضافت «هند»: «لحد ما اكتشفت أنى لما بسافر مع جوزي في حته بيطلعوا شقتي ياخدوا من عفشي وهدومي وحاجتي ويستخدموها، كنت لما ارجع بلاقي الدنيا متبهدلة والحاجة مش على حالها، الأول كنت فاكرة انه بيتهيالي لكن بعد كدة اتاكدت ان فيه حاجة غلط، ولما اسالهم ايه اللي حصل في البيت يقولوا انتي بتتهمينا بالسرقة ويعملوا معايا مشكلة».
حكايات محكمة الأسرة.. سيبت جوزي بسبب عمايل أهله
أنهت «هند» حديثها قائلة: «كنت بسكت ومش بتكلم عشان معملش مشاكل لحد ما الموضوع اتكرر كذا مرة وكل مرة تحصل مشكلة يتخانقوا معايا ويغلطوا فيا مكانوش بيحترموني، لحد ما قررت اني اسيب جوزي وانفصل بعد ما المشاكل كل مادى كانت بتزيد وهما مكنوش سايبني في حالي سيبته بسببهم، رفعت عليه قضية نفقة لأنه مبيسألش على العيال ولا بيصرف بسبب إنهم بيقوموه علينا».