خلود في دعوى نفقة: أهل جوزي سبب جوعي أنا وابني
كانت «خلود» مثل العديد من البنات الاتي يأملن أن يعيشن حياة طبيعية مع من اختاروه أن يكون شريك حياتهم وأن يصبح لديها بيت وأطفال تربيهم وترعاهم لكن تحول حلمها لكابوس بسبب أهل زوجها الذي لم يتقوا الله فيها هم او ابنهم.
"أخوات جوزي وأهله بهدلوني" هذا ما بدأت به «خلود» حديثها عن حياتها الزوجية التي لم تكن سعيدة بسبب تدخلات أهل الزوج، عندما تقدم لـ «خلود» عريسها وأهله وعدوا والديها أن يصونوا ابنتهم ويرعوها ولكن ما حدث في النهاية أنهم كانوا سبب تواجدها في محكمة الأسرة حتى تحصل على حقوقها التي سرقوها منها ومعهم زوجها والد ابنها.
زواج عن حب
قالت خلود: «أنا اتجوزت من 5 سنين، اتجوزت عن قصة حب، وخلفت من جوزي ولد واحد بس، جوزي لما اتقدملي كنت فرحانة أنه أخيرا هنتجوز ويبقى ليا بيت وأولاد، وعلاقتي بأهله كانت كويسة قبل الجواز ومكنش في أي مشاكل واتجوزنا وافتكرت ساعتها أن حلمي تحقق»
أهله بيقوموه عليا
أكملت خلود: «بعد الجواز خلفت ابني والمشاكل بدأت تكتر مع جوزي الأول كانت العادية لكن بعد كدة كل مادى كانت بتكتر، ولاحظت انه المشاكل بتزيد لما يروح يزور أهله، متوقعتش أن أهله يكونوا بيقوموه عليا عشان عمري ما عملت حاجة وحشة معاهم، لكن كانوا هما سبب مشاكلي مع جوزي»
تدخلات الاهل
تابعت خلود: «لحد ما أهله بانوا على حقيقتهم كانوا بيتدخلوا في كل حاجة مفيش حاجة بتحصل في حياتنا هما مش بيعرفوها، كانوا بيتخانقوا معايا كتير ويدخلوني في مشاكل وأنا مليش دعوة بيهم، حتى جوزي كانوا بيخلوه يعد عندهم أيام طويلة ويسبني أنا وابني»
أهله كانوا سبب خراب بيتي
أضافت خلود والدموع في عينيها: «كان بيسبنا كتير من غير أكل أو شرب في البيت ولما أحاول اني أكلمه أقوله يرجع اسمع أمه بتقوله خليها تموت من الجوع، حتى أخواته كانوا بيتدخلوا ويقولوا متديهاش ولا جنية، لحد ما تعبت من الحياة معاه وطلبت الطلاق وأخواته قالوا ليا هيطلقك وهنجوزه واحدة تانية.»
دعوى نفقة
أنهت الزوجة كلامها: «طلقن فعلا وابني مكنش كمل السنتين ومن ساعة ما طلقني مبيسألش فينا ولا بيصرف علي أنا وابنه جيت عشان أرفع قضية نفقة عشان حق ابني. »
