هبة في محكمة الأسرة: مش قادرة أكمل.. الحياة معاه بقت لا تحتمل
تزوجت «هبة» بعد ما تعرفت على زوجها في محل عملها، وعاشت لسنين في خلافات مع زوجها وحاولت بكل الطرق أن تصلح حياتها مع زوجها لكن انتهت بها السبل في النهاية في محكمة الأسرة تبحث عن حقوقها.
حاولت «هبة» في الـ 12 سنة التي عاشتهم مع زوجها أن تحافظ على بيتها حتى لا يتأذى مستقبل أولادها ونفسيتهم بطلاق والديهم، وبعد تحملها لزوجها لسنين عندما وجدت أن المشاكل معه في زيادة والحياة أصبحت صعبة ولا تحتمل بسبب استهتاره، قررت في النهاية أن تتركه وتبحث عن حقوقها من طلاق ونفقة في محكمة الأسرة عسى أن تعوض نفسها وأبنائها عما رأوه في حياتهم مع زوجها.
زواج عن قصة حب
قالت «هبة»: أنا اتجوزت من 2011 معايا ٣ اولاد اكبر واحد عنده 12 سنة، اتعرفت على جوزي عن طريق مكان الشغل كان جواز عن حب اتعرفنا على بعض وحبينا بعض واتجوزنا، الحياة معاه قبل الخلفة كانت عادية ومفيش مشاكل لكن كل ده اتغير مع الوقت.
مبقاش ينفع أكمل معاه
تابعت الزوجة: و دلوقتي سايبه جوزي بقالي ٦ سنين، ربنا يعلم أنا حاولت معاه كتير أنه يتعدل لكن مفيش فايدة، سايباه بسبب انه مبيصرفش والمشاكل بينا كتير ومع الوقت بتزيد ومبقاش ينفع نكمل مع بعض خلاص، طول السنين دي انا اتحملت عشان خاطر عيالي ميتبهدلوش والبيت ميتخربش.
مستهتر ومبيتحملش المسؤولية
أكملت «هبة» كلامها: طول عمره مش مكفي بيته ومخلينا محتاجين، مشاكله كتير معايا مش عايز يشيل مسؤولية لا بيت ولا عيال ولا أي حاجة، اضطريت أني أنزل واشتغل عشان مصاريف البيت، لكن لما لقيت البيت على طول في مشاكل وبيئة مش صالحة للولاد أنهم يكبروا فيها لما بقى بيضربني وعصبي مبقدرش اقف قدامه.
مفيش بنا حاجة ماشية ودي
أنهت «هبة» كلامها قائلة: رافعة قضية طلاق ونفقات ومصاريف، وهو طبعا مبيصرفش غير عن طريق المحاكم، عشان كدة معرفتش أطلق من غير قضية مفيش اي حاجة ودي بينا، أنا اتحملت كتير عشان خاطر بيتي وولاجي لكن فاض بيا الكيل خلاص، ومن ساعة ما سيبته محاولش يرجعني هو خلاص ريح دماغه.