سحر في محكمة الأسرة: كنت مرتاحة منه وهو مسافر ولما رجع ضيع فلوسه على الكباريهات
عاشت «سحر» على ذمه زوجها لمده 13 عام وظن الجميع أن حياتها مرتاحة وليس بها مشاكل، لم يظن أحد أن سبب الذي عاشته الزوجة مع زوجها طوال هذه السنين كان أنه مسافر بعيد عنها وتعيش في راحة من شره.
تزوجت «سحر» من سنين عديدة وعانت من بخل زوجها عليها وعلى أولادها ولكنها كانت تحاول أن تعيش بما يتركه لها زوجها حتى تحافظ على بيتها وتستطيع تربية أولادها، ولكن عندما عاد الزوج من سفره أصبح حمل الزوجة أثقل لأنه فوق بخل زوجها عليها أصبحت تعيش في ضرب واهانة لها ولأولادها من زوجها وعندما فاض بها الكيل من حياتها معه تركته وتوجهت لمحكمة الأسرة لتحصل على حقوقها منه.
مبيصرفش غير على القد من زمان
قالت «سحر»: اتجوزت من 13 سنة، خلفت من جوزي ولدين لما اتجوزت كان عندي 23 سنة، رافعة على جوزي قضايا من شهر واحد بس، جوزي من ساعة ما اتجوزته كان مسافر وكان بيبقى في مشاكل بيني وبينه على انه مبيصرفش على العيال وبيبعت على القد وكنت بحاول أمشي الدنيا بالفلوس اللي بيبعتهالي عشان ولادي.
المشاكل زادت من بعد رجوعه
تابعت «سحر»: لما رجع من السفر واستقر في مصر المشاكل زادت، بقى فوق انه مفيش مصاريف بقى في ضرب واهانة وبهدلة، كان بيشتغل ومعاه فلوس ومبيصرفش، مكنش في حد يصرف عليه فلوسه، مامته متوفية وباباه تعبان، مبيشربش مخدرات، بس اكتشفت بعد فترة انه بيروح كباريهات وبيشرب مخدرات فيها وهي دي اللي مضيعة فلوسه.
كنت مرتاحة من شره 9 سنين
أضافت «سحر»: فضلت معاه 9 سنين والسبب اللي قعدني كل ده انه كان مسافر ومشاكله معايا قليلة وهو بعيد، كل مادى الاهانات والشتايم بتزيد وكان بيمد ايده بس لما اشتكيته لأهلي بطل الضرب، بس بقى بيضرب الولاد من قريب، لحد ما زهقت منه وقررت اسيبه.
بيكسر البيت عشان رفعت خلع ونفقة
أنهت «سحر» كلامها: الولاد معايا وأنا مسيبتش بيتي هو اللي بيجي يبات يوم وعشرة يمشي ومعرفش عنه حاجة، عارف اني رفعت عليه قضية خلع ونفقة، ولما عرف بقى بيكسر البيت عشان يبهدلني.