«محبوس في وصولات أمانة».. هبة لـ القاضي: عايزة أطلق من رد السجون عشان مستقبل بنتي
دعوى طلاق ضرر توجهت بها هبة لمحكمة اﻷسرة لتحاول بها أن تنقذ مستقبل ابنتها بسبب والدها الذي دخل السجن وتم الحكم عليه بـ 9 سنوات ولا تعلم الزوجة كيف تواسي نفسها على الوضع الذي وصلت له.
تزوجت هبة من زوجها منذ 18 عامًا وكانت الحياة بينهما مثل أي زوجين طبيعيين فكانت بها مشاكل لفترة وطبيعية لفترة، حتى استيقظت الزوجة في يوم لتجد زوجها وراء القضبان محكوم عليه بحكم حبس 9 سنوات، واضطرت الزوجة أن تتوجه لمحكمةاﻷسرة لترفع دعوى طلاق ضرر لتطلق من زوجها وتحصل على معاش أبيها لتستطيع أن تصرف على ابنتها الذي ليس لديها غيرها في الدنيا.
حياة طبيعية بين الزوجين
قالت هبة: أنا اتجوزت من 18 سنة، كان جواز صالونات، وخلفت بنت بس من جوزي، ومن ساعة ما اتجوزته مكنش في بينا مشاكل غير الطبيعية زي أي اتنين متجوزين ساعات في مشاكل وساعات لا المشاكل كانت في معظم الوقت على المصاريف، والدنيا كانت بتمشي والحياة طبيعية.
جوزي محبوس في وصولات أمانة
أكملت هبة: لحد من سنة جوزي فجأة اتقبض عليه و اتحبس معرفتش في اﻷول اتحبس ليه، بس عرفت بعد كدة انه اتحبس بسبب وصولات أمانة كان واخد حجات ومسددش فلوسها، معرفش الحجات ايه اللي خدها واتحبس بيها، انا كنت عايشة معاه ومعرفش عنه حاجة وهو مش معرفنش اي حاجة تخصه عشان كدة لما اتحبس كنت مش فاهمة حاجة ولا عارفة اعمل ايه.
محدش بيسال فيا أنا وبنتي
أضافت الزوجة: رفعت طلاق ضرر عشان من ساعة ما جوزي اتحبس و محدش بيصرف عليا أنا وبنتي ولا بيسأل فينا وأنا مبشتغلش، دلوقتي عايزة اتطلق عشان اقدر أخد معاش والدي، ﻷن بنتي محتاجة مصاريف كتيرة وبكرة تعوز تتجوز وأنا اللي هبقى مسئولة اني اجهزها، وجوزي محكوم عليه بـ9 سنين حبس، أنا شفته من ساعة ما اتحبس وبزوره أنا وبنته، أنا لسه على ذمته لكن لما الطلاق يتم مقدرش أزوره بس مش هقدر امنع بنته أنها تزوره وتسأل عليه لحد ما يخرج من الحبس.