خاطفين ضنايا.. سناء لـ القاضي: أمه قالتلي ليكي بنت وخدتيها
في سن ال 17 تزوجت «سناء» من زوجها ولم تكمل الـ 3 سنوات في زواجها حتى وجدت نفسها أمام محكمة الأسرة تشتكي من زوجها الذي لم ترى منه سوى القسوة عليها وعلى أبنائهم، واضطرها أن تتوجه لمحكمة الأسرة لتشتكي منه.
وجدت «سناء» نفسها في سن العشرين بدل أن تبدأ حياتها وجدت نفسها أم لطفلين وزوجها أوصلها لمحكمة الأسرة بسبب ما عاشت معه لـ 3 سنوات عانت فيهم من عدم صرف زوجها عليها وسرقته لها وعدم سؤاله عليها أو على ابنتهم المريضة، ولم يكفيه ما فعله معها وهي زوجته فعندما تركته أخذ منها ابنها وتركها هي وابنتهم دون سؤال.
جوزي مبيصرفش عليا أنا وولاده
قالت «سناء»: انا متجوزة من 3 سنين اتجوزت وأنا عندي 17 سنة ودلوقتي عندي 20 سنة، جوزي في أول الجواز كان كويس ومفيش بينا مشاكل، من ساعة ما خلفت وهو مش عايز يصرف، لما خلفت الولد الأول كان كويس ومفيش مشاكل كان بيصرف بس قليل، ولما خلفت بنتي التانية مبقاش يصرف خالص، وراميني أنا والعيال من غير سؤال.
مش عايز يشيل مسئولية بنته
تابعت «سناء»: قبل الخلفة كان كويس بعد الخلفة مبقاش عايز يصرف خالص، بالذات من ساعة لما خلفت البنت بقى مش عايز يصرف خالص، بنتي تعبانة من ساعة ما اتولدت وبلف بيها على المستشفيات وهو ولا بيسأل في ولا في بنته، كل لما أتكلم معاه يقولي معيش فلوس وفلوسه كلها بيضيعها على المخدرات.
باع عفشي عشان المخدرات
أضافت «سناء»: كان بيشرب من قبل الجواز من بعد الجواز زاد، واستغل وانا بولد في المستشفى وباع حاجتي بتاعت جهازي عشان فلوس المخدرات، لما روحت قالي الحاجة الناقصة متساليش عليها راحت فين، صبرت عليه كل ده ومرديتش اعمل مشاكل، بس لما لاقيت البنت تعبانة وهو مبيسالش فيا وابويا اللي بيصرف عليا أنا وولادي سيبته.
خاطف ابني مني
أنهت «سناء» كلامها وقالت: لما سيبته خدت البنت وهو مرضيش يديني الولد امه قالتلي انتي كان ليكي بنت بس وخدتيها، واخد الولد بقاله 3 شهور، ومش راضي يخليني اشوفه ولما اشوفه في الشارع اهل جوزي يبعدوه عني، ورفعت عليه قضية حضانة انا عايزة عيالي ومش هسيبهم واتخلى عنهم.