«هربان بـ 70 ألف».. نجلاء بدعوى الخلع: جوزي طفش وسابنا وفي الآخر طلع حرامي
محكمة الأسرة كان الحل الذي وصلت له «نجلاء»، بعد ما استيقظت في يوم ووجدت أن زوجها احتفى ولا تعرف طريقه، تاركها هي وأطفالهم وحدهم بعد ما أذاقها ألوان العذاب في حياتها معه وفي النهاية تركها تواجه الحياة وحدها.
تزوجت «نجلاء» ومنذ زواجها وجدت ان الحياة الزوجية ليست كما كانت تحلم بها فكانت مليئة بالصعاب والمشاكل مع الزوج بسبب ظروفه المادية الصعبة، تحملت «نجلاء» زوجها حتى لا تخرب بيتها ولأنها مريضة ولن تجد من يعتني بأطفالها إذا تركت زوجها، لتكون مفاجآتها في يوم من الايام هو هروب زوجها واكتشافها اختلاسه للأموال من ناس لا تعلمهم، وتوجهت الزوجة لمحكمة الأسرة رافعة دعوى خلع حتى تقطع كل علاقتها بزوجها.
أسرة طبيعية وزواج طبيعي
قالت «نجلاء»: أنا اتحوزت من 14 سنة، مكناش نعرف بعض قبل الجواز، جوزي شافني بالصدفة واتقدملي وسألنا عليه أنا وأهلي واتجوزنا، بعد الجواز خلفت طفلين، مكنتش عايزة حاجة من الدنيا غير إننا نعيش مرتاحين وأربي العيال تربية كويسة.
أخرة 20 جنيه مصاريف
تابعت الزوجة: للأسف جوزي مكنش كويس معايا طول جوازنا كان متكل عليا في كل حاجة مصاريف ومسئولية العيال وكل حاجة تخص البيت، مكنش بيصرف علينا خالص كان أخره بيديني عشرين ولا تلاتين جنيه أمشي نفسي بيهم، وأنا كنت بضطر أمشي حياتي بيهم، أنا تعبانة ومريضة كلى ومقدرش أنزل اشتغل.
جوزي طفش فجأه
أضافت «نجلاء»: لحد فجأه من كام شهر هو سابني أنا والعيال وطفش ومعرفش طريقه فين، وقتها مكنش في مشاكل أو حاجة بينا، فجأة كدة اختفى ومحدش يعرف هو راح فين، وبعدما مشي جالي ناس وقالولي إن جوزي عمل مشاكل معاهم واتهموه إنه سرق منهم 70 ألف جنيه.
رفعت قضية خلع عشان ميدخلنيش في مشاكل
أكملت الزوجة: وبعد ما جوزي مشي الناس دول طالبوني بالفلوس اللي خدها، وقلتلهم أنا معرفش حاجة عنه، ولما عرفوا إني تعبانة سابوني ومجوش يطالبوني تاني، وجيت ارفع قضية خلع عشان ميبقاش ليا أي علاقة بيه ومدخلش في مشاكل تاني، دلوقتي أنا وأولادي ملناش علاقة بيه ،اهلي اللي بيصرفوا عليا وبيساعدوني عشان مرضي.
تابع أحدث الأخبار عبر
